Skíðalyfta í Hlíðarfjall

Íþróttaráð þakkar Vinum Hlíðarfjalls áhugann og vinnuna sem þeir hafa sýnt uppbyggingu í Hlíðarfjalli.

Mikil vinna hefur verið í gangi í aðgerðarhópi um framtíðarrekstur Akureyrarbæjar og á meðan á þeirri vinnu stendur hefur íþróttaráð ekki heimild til að bæta í rekstur Hlíðarfjalls.

Íþróttaráð vísar erindinu til bæjarráðs.

Bæjarráð felur bæjarstjóra að ræða við fulltrúa Vina Hlíðarfjalls um nánari útfærslu á sameiginlegri aðkomu þeirra og bæjarins við frekari uppbyggingu í Hlíðarfjalli. Jafnframt tekur bæjarráð undir bókun íþróttaráðs frá 17. mars sl. þar sem ráðið felur forstöðumanni íþróttamála að hefja undirbúning á úthýsingu rekstrar Hlíðarfjalls.

Bæjarráð felur bæjarstjóra, Guðmundi Baldvini Guðmundssyni og Gunnari Gíslasyni að ræða við bréfritara.

Bæjarráð samþykkir að fela fjármálastjóra, forstöðumanni íþróttamála og forstöðumanni skíðasvæðisins í Hlíðarfjalli að vinna að frekari útfærslu á kostnaðaráætlun og vinna drög að samningi við Vini Hlíðarfjalls um kaup og uppsetningu á lyftu og leggja fyrir fund bæjarráðs 12. janúar 2017.

Bæjarráð felur bæjarstjóra og sviðsstjóra fjársýslusviðs að vinna áfram að málinu í samræmi við umræður á fundinum. Bæjarráð vísar málinu til frístundaráðs til umfjöllunar þegar frekari gögn liggja fyrir.

Málið verður tekið fyrir aftur á fundi bæjarráðs 2. febrúar nk.

Bæjarráð frestar afgreiðslu til næsta fundar.

Akureyrarbær og ríkisvaldið gerðu með sér samning um Vetraríþróttamiðstöð Íslands á Akureyri árið 1995 og uppbyggingu vetraríþrótta í bæjarfélaginu árið 1997 og aftur 2003. Seinni samningurinn rann út árið 2008 og hefur Akureyrarbær ítrekað óskað eftir því að nýr samningur verði gerður m.a. um frekari uppbyggingu í Hlíðarfjalli en ekkert hefur orðið af slíkum samningi. Akureyrarbær hefur þrátt fyrir það varið verulegum fjárhæðum eða um 120 milljónum króna til uppbyggingar vegna vetraríþrótta í Hlíðarfjalli frá árinu 2008.

Bæjarráð Akureyrar samþykkir að ganga til samninga við Vini Hlíðarfjalls um uppbyggingu nýrrar skíðalyftu í Hlíðarfjalli og felur bæjarstjóra að vinna að málinu en mikilvægt er að samningurinn taki mið af þeirri vinnu sem á sér stað við úthýsingu á rekstri Hlíðarfjalls sem og uppbyggingu Vetraríþróttamiðstöðvar Íslands.



Sóley Björk Stefánsdóttir V-lista óskar bókað:

Ég tel þetta verkefni ekki samræmast skynsamlegri nýtingu á skattfé, ekki síst í ljósi áforma um útvistun rekstrarins. Einnig tel ég í hæsta máta óeðlilegt að íbúar Akureyrar standi einir straum af kostnaði við uppbyggingu í Vetraríþróttamiðstöð Íslands og tel eðlilegt að þátttaka Akureyrarbæjar í verkefninu skilyrðist af þátttöku ríkisins.

Bæjarráð felur bæjarstjóra að vinna áfram að málinu.

Frístundaráð lýsir yfir ánægju með þá rausnarlegu gjöf Samherja að gefa Vinum Hlíðarfjalls nýja stólalyftu. Ráðið hvetur til þess að framkvæmdum við uppsetningu verið flýtt eins og kostur er og felur deildarstjóra íþróttamála og forstöðumanni Hlíðarfjalls að vinna málið áfram.

Bæjarráð samþykkir drögin fyrir sitt leyti og felur sviðsstjóra fjársýslusviðs og bæjarlögmanni að ganga frá samkomulaginu fyrir hönd Akureyrarbæjar og útbúa viðauka vegna málsins.

Ljóst er að kostnaður mun falla á Akureyrarbæ vegna uppsetningu nýrrar lyftu í Hlíðarfjalli sem mun kalla á viðauka við fjárhagsáætlun. Málið verður tekið aftur fyrir á næsta fundi ráðsins.

Frístundaráð samþykkir að óska eftir því við bæjarráð að veittur verði viðauki við fjárhagsáætlun 2019 vegna framkvæmda í Hlíðarfjalli í tengslum við uppsetningu nýrrar stólalyftu. Um er að ræða framkvæmdir við að leggja háspennustreng að endastöð nýrrar lyftu að upphæð kr. 11.125.000 og kaup á aðgangsstýringarkerfi (hliðum) að upphæð kr. 4.000.000. Samtals kr. 15.125.000.

Bæjarráð frestar afgreiðslu og óskar eftir því að sviðsstjóri samfélagssviðs, forstöðumaður Hlíðarfjalls og formaður frístundaráðs mæti á næsta fund ráðsins.

Bæjarráð felur sviðsstjóra samfélagssviðs og forstöðumanni Hlíðarfjalls að útbúa minnisblað vegna framkvæmdanna og leggja fyrir næsta fund bæjarráðs.

Meirihluti bæjarráðs samþykkir viðauka að fjárhæð 12,6 milljónir króna vegna framkvæmda við skíðaleiðir í Hlíðarfjalli og felur sviðsstjóra fjársýslusviðs að ganga frá viðaukanum og leggja fyrir bæjarráð.

Sóley Björk Stefánsdóttir V-lista sat hjá við afgreiðslu.

Meirihluti bæjarráðs felur bæjarstjóra og sviðsstjóra fjársýslusviðs að útbúa minnisblað vegna málsins og leggja fyrir næsta fund bæjarráðs.

Sóley Björk Stefánsdóttir V-lista situr hjá við afgreiðslu.

Frístundaráð óskar eftir upplýsingum um hver kostnaður Akureyrarbæjar við uppsetningu lyftunnar sé orðinn.

Meirihluti bæjarráðs samþykkir að gengið verði til samninga við Vini Hlíðarfjalls um kaup á nýrri lyftu í Hlíðarfjalli. Með samningnum verði gert ráð fyrir að bærinn yfirtaki eignina við verklok í stað þess að leigja til næstu 15 ára eins og segir í uppbyggingarsamningi. Þessar breytingar á samningi eru til komnar vegna verulega aukins kostnaðar við uppsetningu lyftunnar. Vinir Hlíðarfjalls og Akureyrarbær munu leggja til aukin framlög og yrði hlutur bæjarins allt að 60 milljónum króna hærri en uppbyggingarsamningur gerði ráð fyrir auk meira vinnuframlags starfsmanna Hlíðarfjalls. Ekki er gert ráð fyrir að kostnaður Akureyrarbæjar til framtíðar verði meiri en í forsendum uppbyggingarsamningsins.

Meirihluti bæjarráðs felur bæjarstjóra að gera drög að samningi og leggja fyrir bæjarráð.

Sóley Björk Stefánsdóttir V-lista situr hjá við afgreiðsluna og leggur fram eftirfarandi bókun:

Ég ítreka bókun mína frá 2. mars 2017 um að ég telji ekki að þetta verkefni sé skynsamleg nýting á skattfé enda hefur það orðið augljósara eftir því sem tíminn líður og þá enn betur fyrr í dag þegar bæjarráð vísaði til bæjarstjórnar fjárhagsáætlun með tillögum að aðhaldsaðgerðum í fræðslu- og forvarnarmálum.

Stjórn Hlíðarfjalls leggur á það áherslu að allur frágangur við lyftuna verði með þeim hætti að ekki muni falla til kostnaður á Akureyrarbæ eftir að lyftan er komin í gang.

Stjórn Hlíðarfjalls þakkar Inga fyrir veittar upplýsingar. Ljóst er að afhendingartími verður ekki fyrr en að lokinni öryggisúttekt sem erlendir sérfræðingar þurfa að framkvæma. Miðað við stöðuna vegna COVID verður afhending líklegast ekki fyrr en í byrjun árs 2021. Stjórnin felur starfsmönnum að lista upp öll þau atriði sem eftir er að framkvæma tengt uppsetningu lyftunnar samkvæmt samningi og hvar kostnaður við einstök atriði muni lenda, þ.e. á Vinum Hlíðarfjalls eða Akureyrarbæ.

Stjórn Hlíðarfjalls þakkar Geir og Inga fyrir komuna á fundinn og felur sviðsstjóra að kalla eftir skýrslu frá úttektaraðilum.

Stjórn Hlíðarfjalls óskar eftir að tekinn verði saman kostnaður sem fallið hefur á Akureyrarbæ vegna uppsetningar lyftunnar og rekstraráætlun verði yfirfarin.

Stjórn Hlíðarfjalls leggur til við bæjarráð sem tekur endanlega ákvörðun, að tekið verði við lyftunni með fyrirvara um að tímabundin heimild fáist frá Veðurstofu Íslands gagnvart núverandi verklagi við snjóflóðahættumat. Jafnframt leggur stjórn til að hluta greiðslu verði haldið eftir þangað til öllum verkþáttum að hálfu Stólalyftu ehf. verði lokið og eins ef eitthvað kemur upp á við rekstur lyftunnar sem rekja megi til ófullnægjandi búnaðar eða frágangs.

Fyrir liggur að rekstarkostnaður við lyftuna verður meiri en gert var ráð fyrir m.a. vegna snjóflóðavarna.

Meirihluti bæjarráðs felur bæjarlögmanni, sviðsstjóra fjársýslusviðs og sviðsstjóra samfélagssviðs að ganga til samninga við Stólalyftu ehf. um greiðslur og afhendingu lyftunnar í samræmi við tillögu stjórnar Hlíðarfjalls og umræður á fundinum. Drög að samningi verði lögð fyrir bæjarráð.

Hlynur Jóhannsson M-lista greiðir atkvæði á móti.

Meirihluti bæjarráðs staðfestir samninginn og felur bæjarstjóra að undirrita hann fyrir hönd bæjarins.

Hlynur Jóhannsson M-lista situr hjá við afgreiðsluna.

Stjórn Hlíðarfjalls samþykkir tillögu frá Vinum Hlíðarfjalls um nafngift. Verður nafnið opinberað við formlega opnun lyftunnar.

Stjórn Hlíðarfjalls felur forstöðumanni Hlíðarfjalls að fá verkfræðilega úttekt á þeirri lausn sem starfsmenn hafa lagt til.

Stjórn Hlíðarfjalls felur forstöðumanni viðhalds hjá umhverfis- og mannvirkjasviði að fylgja eftir verklokum og lokaúttekt á lyftumannvirkjum í Hlíðarfjalli.

Bæjarráð samþykkir tillöguna og felur forstöðumanni Hlíðarfjalls að kynna nafngiftina í tengslum við Andrésar Andar leikana sem hefjast 20. apríl nk.