Spurt og svarað um nýja gjaldskrá leikskóla

Get ég sótt barnið á hádegi á föstudegi og átt inni þá tíma gjaldfrjálsa?

Nei, það er ekki hægt, eingöngu er miðað við tímann 8-14 gjaldfrjálsan.

Get ég haft sveigjanleika í samræmi við vaktaplan?

Já, í samráði við skólastjóra verður í boði að skrá skólatíma samkvæmt vaktaplani og þá er innheimt fyrir meðalfjölda klukkustunda umfram 8-14. Einnig er hægt að skrá mismunandi skólatíma eftir vikudögum, t.d. alltaf til 16 á mánudögum en 15 á þriðjudögum.

Get ég haft barnið frá 9-15 eða 10-16 gjaldfrjálst?

Nei, eingöngu tíminn frá 8-14 er gjaldfrjáls. Skólastarf hefst kl. 8 að morgni. Í skólastarfi felst daglegt skipulag sem felur í sér leik, máltíðir auk sérstakra stunda þar sem unnið er með afmarkaða þætti (hópastarf, gæðastundir, val, hreyfingu o.s.frv.).

Hvernig er með foreldra í fæðingarorlofi?

Tekjutenging gjaldskrár tekur mið af skattaframtali síðasta árs, en hægt er að sækja um endurskoðun á tekjutengingu ef aðstæður breytast, t.d. við tekjumissi, skilnað eða fæðingarorlof.

Munu skráningardagarnir halda áfram samhliða nýju gjaldskránni?

Já, skráningardagar eru 20 á hverju skólaári. Hægt er að sjá skráningardaga á skóladagatali heimasíðu hvers skóla, sem sjá má á heimasíðu þeirra

Hvernig reiknast skráningardagarnir inn í gjaldið á mánuði?

Skráningu fyrir skráningardaga lýkur 20. dag mánaðarins á undan. Þannig greiðist gjaldið fyrir þá með reikningi fyrir þann mánuð sem skráningardagarnir eru í. Dæmi: Skráningu fyrir skráningardaga í desember lýkur 20. nóvember. Gjaldið fyrir skráningardaga í desember greiðist með desemberreikningi. Skólagjöld hvers mánaðar taka því mið af hversu mörgum skráningardögum óskað er eftir hvert sinn.

Eru einhver sérkjör fyrir starfsmenn sveitarfélagsins sem eiga leikskólabörn?

Nei.

Verður eingöngu horft á laun foreldra en engar aðrar breytur svo sem húsnæðislán?

Já, eingöngu er horft til tekna. Afslættir á skólatíma eru tekjutengdir og taka mið af hjúskaparstöðu og tekjum skv. skattframtali síðasta árs. Afsláttarkjör ná ekki til fæðiskostnaðar.

Hvernig reiknast fjölskylduafsláttur?

Fjölskylduafsláttur nær til allra fjölskyldna óháð tekjum með fleira en eitt barn hjá dagforeldri, í leikskóla og/eða í frísund. Fjölskylduafsláttur er reiknaður af grunngjaldi. Til að njóta fjölskylduafsláttar þurfa börnin að vera skráð á kennitölu sama forráðamanns og með sameiginlegt lögheimili.