Bæjarráð

Bæjarráð samþykkir tillögu fræðsluráðs og vísar henni til viðauka.

Bæjarráð samþykkir framlagðan viðauka 3 og vísar honum til staðfestingar í bæjarstjórn.

Akureyrarbær og ríkisvaldið gerðu með sér samning um Vetraríþróttamiðstöð Íslands á Akureyri árið 1995 og uppbyggingu vetraríþrótta í bæjarfélaginu árið 1997 og aftur 2003. Seinni samningurinn rann út árið 2008 og hefur Akureyrarbær ítrekað óskað eftir því að nýr samningur verði gerður m.a. um frekari uppbyggingu í Hlíðarfjalli en ekkert hefur orðið af slíkum samningi. Akureyrarbær hefur þrátt fyrir það varið verulegum fjárhæðum eða um 120 milljónum króna til uppbyggingar vegna vetraríþrótta í Hlíðarfjalli frá árinu 2008.

Bæjarráð Akureyrar samþykkir að ganga til samninga við Vini Hlíðarfjalls um uppbyggingu nýrrar skíðalyftu í Hlíðarfjalli og felur bæjarstjóra að vinna að málinu en mikilvægt er að samningurinn taki mið af þeirri vinnu sem á sér stað við úthýsingu á rekstri Hlíðarfjalls sem og uppbyggingu Vetraríþróttamiðstöðvar Íslands.



Sóley Björk Stefánsdóttir V-lista óskar bókað:

Ég tel þetta verkefni ekki samræmast skynsamlegri nýtingu á skattfé, ekki síst í ljósi áforma um útvistun rekstrarins. Einnig tel ég í hæsta máta óeðlilegt að íbúar Akureyrar standi einir straum af kostnaði við uppbyggingu í Vetraríþróttamiðstöð Íslands og tel eðlilegt að þátttaka Akureyrarbæjar í verkefninu skilyrðist af þátttöku ríkisins.

Gunnar Gíslason D-lista lagði fram eftirfarandi tillögu:

Á fundi sínum 3. janúar sl. samþykkti bæjarstjórn tillögu að álagningu fasteignagjalda á árinu 2017. Þar var gert ráð fyrir því að fasteignagjöld á verbúðum færi úr flokki a) II í flokk c) án þess að það væri tilgreint sérstaklega og hvað þessi breyting hefði í för með sér. Þessi breyting hefur það í för með sér að í stað þess að álagt fasteignagjald á verbúðir sé 0,625% af fasteignamati húsa og lóða verður það 1,65%. Þessi breyting leiðir til mikillar hækkunar fasteignagjalda hjá eigendum verbúða á Akureyri. Auk þess að hækkunin er mikil var hún ekki kynnt þeim sem hlut eiga að máli og kom hún því flatt upp á marga, sérstaklega ellilífeyrisþega sem eru að sinna sínu tómstundastarfi í verbúðum og eru með litla báta.

Ég tel að það eigi að vera regla hjá Akureyrarkaupstað að kynna allar breytingar á gjaldskrám með góðum fyrirvara áður en þær taka gildi. Þar sem þessi breyting er í samræmi við lög þá er hæpið að leggjast gegn henni en ég legg til að gildistöku þessarar hækkunar verði frestað um ár í ljósi þess hvernig staðið var að henni.

Tillagan var borin upp og felld með 3 atkvæðum gegn atkvæði Gunnars Gíslasonar D-lista. Preben Jón Pétursson Æ-lista sat hjá við afgreiðslu.



Meirihluti bæjarráðs tekur undir með Gunnari Gíslasyni bæjarfulltrúa um mikilvægi þess að settir verði skýrir verkferlar um framkvæmd breytinga á gjaldskrám. Breyting á álagningu fasteignagjalda á verbúðir sem hér um ræðir var gerð til samræmis við lög nr. 4/1995 um tekjustofna sveitarfélaga, með síðari breytingum, og því ekki hægt að fallast á tillögu Gunnars um frestun.

Bæjarráð harmar þá afstöðu sem meirihluti sveitarfélaga á Eyjafjarðarsvæðinu hefur tekið varðandi möguleika á gerð fýsileikakönnunar. Jafnframt felur bæjarráð forseta bæjarstjórnar að boða til fundar með forsvarsmönnum Dalvíkurbyggðar og Svalbarðsstrandarhrepps um möguleika á útfærslu á slíkri könnun.

Bæjarráð samþykkir erindi hópsins um að húsaleiga nýrrar fjölskyldu flóttafólks falli undir félagslegar íbúðir bæjarins. Kostnaður vegna þessa rúmast innan fjárhagsáætlunar.

Bæjarráð hvetur nefndir og svið bæjarins til að skoða verkefni sem falla undir reglur sjóðsins og senda tillögur til bæjarstjóra fyrir 10. apríl nk.