Skipulagsráð

Kynningu skipulagslýsingar í samræmi við 1. mgr. 30. gr. skipulagslaga nr. 123/2010 er lokið. Alls bárust 113 ábendingar við lýsinguna. Umsagnir bárust frá Minjastofnun Íslands, Isavia, SAk, Skipulagsstofnun, Norðurorku og Veðurstofu Íslands.

Þá er jafnframt lagt fram minnisblað frá GeoTek ehf. um niðurstöður jarðvegsrannsókna á svæðinu.

Lagt fram erindi Fanneyjar Hauksdóttur hjá AVH arkitektum dagsett 19. janúar 2022 fyrir hönd RA 5 ehf. þar sem óskað er eftir heimild til að hefja vinnu við gerð tillögu að deiliskipulagi vegna fyrirhugaðrar stækkunar verslunarmiðstöðvar við Sunnuhlíð 12.

Lögð fram fyrirspurn Yrkis Arkitekta ehf. fyrir hönd SS Byggis ehf. dagsett 20. janúar 2022 um breytingu á deiliskipulagi Holtahverfis norður vegna uppbyggingar á lóðum við Þursaholt nr. 5, 7 og 9.

Er óskað eftir eftirfarandi;

1. Nýtingarhlutfall verði aukið til að ná fram fjölbreyttari og betri íbúðargerðum án þess að fara út fyrir byggingarreit.

2. Að byggður verði sameiginlegur bílakjallari fyrir húsin þrjú sem einnig felur í sér sameiningu lóðanna.

3. Heimild til að byggja svalir og þakkanta að hámarki 1,8 m út fyrir byggingarreit.

Lagðar fram tvær tillögur að útfærslu deiliskipulags fyrir athafnasvæði við Hlíðarfjallsveg. Í báðum tillögum er gert ráð fyrir lóð fyrir gagnaver nyrst á svæðinu auk möguleika á stækkun til austurs.

Þá er jafnframt lagt fram erindi Hjartar Narfasonar og Þórarins Kristjánssonar dagsett 4. janúar 2022 þar sem óskað er eftir lóð fyrir uppbyggingu gróðurhúss í tengslum við starfsemi gagnavers.

Lögð fram til kynningar vinningstillaga Yrkis Arkitekta ehf. að breytingum á ráðhúsi Akureyrarbæjar. Vinna við hönnun sem byggir á tillögunni er að hefjast og gera þarf breytingu á deiliskipulagi fyrir miðbæ Akureyrar til samræmis við þá vinnu.

Auglýsingu deiliskipulagstillögu í samræmi við 1. mgr. 41. gr. skipulagslaga nr. 123/2010 er lokið. Fjórar athugasemdir bárust auk umsagna frá Minjastofnun Íslands og Norðurorku.

Grenndarkynningu deiliskipulagstillögu skv. 44. gr. skipulagslaga nr. 123/2010 er lokið. Ein athugasemd barst og er hún lögð fram ásamt viðbrögðum umsækjanda við efni athugasemdar.

Grenndarkynningu tillögu að deiliskipulagsbreytingu er lokið. Fjórar athugasemdir bárust og eru þær lagðar fram.

Erindi dagsett 20. janúar 2022 þar sem Guðmundur Hjálmarsson fyrir hönd G. Hjálmarssonar hf. sækir um lóðarstækkun og breytingu á aðal- og deiliskipulagi vegna lóðar nr. 2 við Goðanes. Svæðið sem stækkunin nær til er skilgreint sem opið, óbyggt svæði í núgildandi aðalskipulagi. Það er austan við núverandi lóð og fyrirhugað er að nýta það sem geymslusvæði. Skipulagsbreytingin felur jafnframt í sér að byggt verði stakt hús norðan og austan við núverandi hús í stað viðbyggingar til vesturs. Þá verði bætt við aðkomu að lóðinni frá Freyjunesi. Meðfylgjandi er skýringarmynd og greinargerð.

Erindið var áður á dagskrá skipulagsráðs þann 8. desember sl. og var afgreiðslu þess frestað þar til fyrir lægi nánari útfærsla svæðisins.

Erindi dagsett 12. janúar 2022 þar sem Ragnar Freyr Guðmundsson fyrir hönd Rafmanna ehf. óskar eftir stækkun byggingarreits á lóð nr. 6C við Frostagötu. Meðfylgjandi er skýringarmynd.

Erindi dagsett 17. janúar 2022 þar sem Andrea Ólöf Ólafsdóttir óskar eftir stækkun byggingarreits fyrir bílskúr á lóð nr. 22 við Rauðumýri. Meðfylgjandi er skýringarmynd.

Erindi dagsett 17. janúar 2022 þar sem Jón Birgir Gunnlaugsson fyrir hönd umhverfis- og mannvirkjasviðs Akureyrarbæjar kynnir fyrirhugaða framkvæmd við færslu stígs og brúar við Fremri-Lambá á Glerárdal. Meðfylgjandi eru umsögn Umhverfisstofnunar, skýringarmynd og greinargerð. Sótt verður um framkvæmdaleyfi til Umhverfisstofnunar þar sem fyrirhuguð framkvæmd er innan fólkvangsins á Glerárdal.

Erindi dagsett 11. janúar 2022 þar sem Geir Sigurðsson sækir um lóð nr. 4 við Matthíasarhaga. Meðfylgjandi er yfirlýsing viðskiptabanka.

Erindi dagsett 12. janúar 2022 þar sem Vesturkantur ehf. sækir um lóð nr. 12 við Týsnes. Til vara er sótt um lóð nr. 11 við Sjafnargötu. Meðfylgjandi er greinargerð og yfirlýsing viðskiptabanka.

Erindi dagsett 21. desember 2021 þar sem Akurberg ehf. sækir um lóð nr. 18 við Goðanes. Meðfylgjandi er verkáætlun og yfirlýsing viðskiptabanka.

Á fundi bæjarstjórnar þann 21. september 2021 var skipulagsráði falið að vinna drög að breytingum á reglum um tímabundnar lokanir gatna í samráði og samtali við hagaðila.

Umsóknarfrestur um langtímaleyfi söluvagna fyrir árið 2022 rann út þann 20. janúar sl. Fjórar umsóknir bárust um þau þrjú langtímaleigustæði sem auglýst voru laus til úthlutunar.

Lögð fram til kynningar fundargerð 846. fundar, dagsett 6. janúar 2022, með fullnaðarafgreiðslum erinda. Fundargerðin er í 5 liðum og er að finna á heimasíðu Akureyrarbæjar.

Lögð fram til kynningar fundargerð 847. fundar, dagsett 14. janúar 2022, með fullnaðarafgreiðslum erinda. Fundargerðin er í 2 liðum og er að finna á heimasíðu Akureyrarbæjar.

Lögð fram til kynningar fundargerð 848. fundar, dagsett 20. janúar 2022, með fullnaðarafgreiðslum erinda. Fundargerðin er í 1 lið og er að finna á heimasíðu Akureyrarbæjar.