Fréttasafn

Húsið að Gránufélagsgötu 7 var rifið nýverið með það fyrir augum að fjölga bílastæðum á miðbæjarsvæðinu. Í miðbæjarskipulagi frá árinu 1981 var þá þegar gert ráð fyrir að húsið viki fyrir bílastæðum og svo er einnig í miðbæjarskipulaginu frá 2014 sem sjá má í viðhengi með fréttinni.

Á morgun, miðvikudaginn 1. febrúar, er boðað til opins kynningarfundar um nýjan ferðamannaveg um Norðurland sem markaðssetja á fyrir erlenda ferðamenn og vekja þannig athygli á merkum stöðum nærri strandlengjunni frá Sauðárkróki til Vopnafjarðar. Fundurinn verður haldinn í Ráðhúsinu á Akureyri, bæjarstjórnarsalnum á 4. hæð, frá kl. 15-16.

Í dag er blásið til leiks í hinum stórskemmtilega og æsispennandi lestrarlandsleik Allir lesa! Mörg sveitarfélög hvetja bæjarbúa til að mynda lið og skrá lestur í von um að í bænum leynist sigurliðið, og þar með öflugustu lestrarhestar landsins!

Akureyrarbær og Háskólinn á Akureyri hafa skrifað undir samning um styrk til Vísindaskóla unga fólksins. Þetta er í þriðja skipti sem Akureyrarbær styrkir verkefnið. Markmið bæjarins með styrkveitingunni er að styðja við fjölbreytni í tómstundatilboðum til barna og gefa börnum á Akureyri tækifæri til þess að kynnast heimi vísinda og fræða.

Þorsteinn Víglundsson, félags- og jafnréttismálaráðherra, undirritaði í gær samninga við Dag B. Eggertsson borgarstjóra í Reykjavík og Eirík Björn Björgvinsson, bæjarstjóra á Akureyri, um mótttöku sex sýrlenskra flóttafjölskyldna sem væntanlegar eru til landsins eftir helgi. Fimm þeirra setjast að í Reykjavík og ein á Akureyri.

Franska sendiráðið og Alliance française í Reykjavík, í samstarfi við Háskólabíó, Institut français, kanadíska sendiráðið og Borgarbíó, kynna Frönsku kvikmyndahátíðina sem fram fer dagana 28. janúar - 3. febrúar á Akureyri.

Eiríkur Björn Björgvinsson bæjarstjóri á Akureyri og Matthías Rögnvaldsson forseti bæjarstjórnar heimsóttu í dag fjölskyldu á Sólvöllum á Akureyri til að heiðra þann íbúa bæjarins sem telst vera númer 18.500 í röðinni. Hann er lítill drengur sem kom í heiminn 4. janúar síðastliðinn.

Kemstu til Reykjavíkur á rafbílnum þínum? Eyþing og Samtök sveitarfélaga á Norðurlandi vestra boða til opins fundar um uppbyggingu innviða fyrir rafbíla á Norðurlandi. Fundurinn verður haldinn miðvikudaginn 25. janúar kl. 17-19 í Hömrum í Hofi á Akureyri.

Listasafnið á Akureyri efnir til sýningar á verkum eftir norðlenska myndlistarmenn, 10. júní - 27. ágúst 2017. Dómnefnd velur úr innsendum verkum listamanna sem búa og/eða starfa á Norðurlandi eða hafa tengingu við svæðið. Umsóknarfrestur er til og með 1. mars næstkomandi.

Síðasta miðvikudag var því fagnað að ár er liðið frá komu sýrlensku fjölskyldnanna til Akureyrar. Hingað komu fjórar fjölskyldur, 23 einstaklingar, frá Líbanón þar sem þær höfðu verið eftir flótta frá Sýrlandi. Óhætt er að segja að þeim hafi gengið vel að feta sig í nýjum heimkynnum.