Fréttasafn

Fyrsta flug breska lággjaldaflugfélagsins easyJet var til Akureyrar í gær en félagið mun fljúga tvisvar í viku, á þriðjudögum og laugardögum, milli Gatwickflugvallar í Lundúnum og Akureyrar út mars 2024.

Akureyrarbær auglýsir eftir umsóknum í Menningarsjóð fyrir árið 2024. Umsóknarfrestur allra umsókna er til og með 22. nóvember 2023.

Á fundi bæjarstjórnar 17. október sl. var samþykkt að bæta nýjum kafla við umhverfis- og loftlagsstefnu Akureyrarbæjar fyrir árin 2022-2030. Kaflinn ber yfirskriftina "Umgengni og stjórnsýsla" og fjallar um mikilvægi þess að tryggja góða ásýnd bæjarins og halda bæjarlandi, lóðum og athafnasvæðum snyrtilegum. Lögð er áhersla á að sveitarfélagið sýni gott fordæmi í umgengni við umhverfið og geri sambærilegar kröfur til verktaka og framkvæmdaaðila.

Laugardaginn 4. nóvember kl. 14 verður haldið í Menningarhúsinu Hofi málþing á vegum Akureyrarbæjar og AkureyrarAkademíunnar um stefnu Akureyrarbæjar í umhverfis- og loftslagsmálum. Sérstök áhersla verður lögð á umfjöllun um útblástur gróðurhúsalofttegunda, breyttar ferðavenjur, aukna nýtingu á innlendri orku, minni sóun og meiri endurvinnslu.

Bæjarstjórn Akureyrarbæjar kemur saman til fundar þriðjudaginn 31. október næstkomandi kl. 16.

Stjórn SAMTAKA, foreldrafélaganna á Akureyri, og Heimili og skóli bjóða foreldrum og forsjáraðilum barna og ungmenna að taka þátt í vinnustofu við gerð Farsældarsáttmála. Á vinnustofunni gefst foreldrum kostur á að leggja sitt af mörkum til að stuðla að farsæld barna í sveitarfélaginu og efla samstöðu þeirra sem að málum barna og ungmenna koma.

Starfsmenn skíðasvæðisins í Hlíðarfjalli hafa lokið við að setja saman 63ja metra yfirbyggingu úr gegnsæjum einingum á hið svokallaða Töfrateppi. Yfirbyggingin myndar eins konar göng utan um færibandið og skýlir þeim sem það nota fyrir veðri og vindum.

Alþjóðlega kvikmyndahátíðin, Northern Lights - Fantastic Film Festival, er nú haldin í fyrsta skipti á Akureyri. Hátíðin verður dagana 26.-29. október og sýndar verða 38 alþjóðlegar stuttmyndir í Ketilhúsinu og Hofi. Þemað er m.a. hrollvekja, enda myndirnar sýndar í kringum hrekkjavökuhátíðina, en einnig vísindaskáldskapur, fantasía ævintýri og hreyfimyndir

Um síðustu helgi fór fram fyrsta listvinnustofa verkefnisins Allt til enda - Listvinnustofur barna árið 2023 í Listasafninu á Akureyri. Þá bauð Elías Rúni, myndasöguhöfundur, myndlýsir og grafískur hönnuður, börnum í 3.-6. bekk að gera tilraunir með myndasöguformið og kynnast ólíkum leiðum til að segja sögur í myndum með áherslu á skapandi form og frásögn. Innblástur var sóttur í hversdagsleikann og sagna leitað í minningum og því sem er efst á baugi í samfélaginu.

Fimmtudaginn 26. október kl. 20 verður seinni ritlistasmiðja Ungskálda 2023 á LYST í Lystigarðinum. Að þessu sinni er leiðbeinandinn Yrsa Sigurðardóttir. Hún hefur sent frá sér sex barnabækur og nítján bækur fyrir fullorðna lesendur. Bækur hennar hafa verið þýddar á meira en þrjátíu tungumál og hafa prýtt vinsældalista víða um heim auk þess að njóta mikilla vinsælda á Íslandi. Yrsa hefur þrívegis hlotið íslensku glæpasagnaverðlaunin Blóðdropann og einu sinni hlotið Íslensku barnabókaverðlaunin, auk þess að hafa unnið til erlendra verðlauna fyrir skrif sín.

Viðbúið er að þjónusta Strætisvagna Akureyrar skerðist nokkuð vegna kvennaverkfalls þriðjudaginn 24. október. Símsvörun hjá ferliþjónustu verður takmörkuð þennan dag og Leiðir 2 & 4 hætta akstri kl. 15.53.