Fréttasafn

Hríseyjarbúðin ehf. hefur hlotið styrk að upphæð 4.730.000 kr. og verslunin í Grímsey að upphæð 2.000.000 kr. á grunvelli stefnumótandi byggðaáætlunar fyrir árin 2022-2036. Samtals var 30 milljónum úthlutað að þessu sinni til verslunar í dreifbýli fyrir árin 2022 og 2023 og verða samningar vegna styrkjanna undirritaðir á næstu dögum.

Samkvæmt deiliskipulögum í Naustahverfi er gert ráð fyrir leiksvæðum við Hólatún norðan Klettatúns, við Sómatún, austan Vallartúns og við Krókeyrarnöf og er ætlunin að fara í jarðvegsskipti og fleira á næstunni ef veður leyfir. Uppsetning leiktækja og frágangur svæðanna með gróðri fer svo fram í byrjun sumars 2023. Reynt verður að haga framkvæmdum þannig að ónæði verði sem minnst.

Torben Hansen, borgarstjóri danska vinabæjarins Randers, sendir íbúum Akureyrar jólakveðju í meðfylgjandi myndbandi. Þar greinir hann líka frá þeirri sameiginlegu ákvörðun bæjanna að hætta að senda stórt jólatré sjóleiðina frá Randers til Akureyrar eins og gert hefur verið um langt árabil.

Í Bjarmahlíð, miðstöð fyrir þolendur ofbeldis á Norðurlandi, hefur orðið vart við vaxandi þörf á stuðningi við ungmenni á framhaldsskólaaldri (frá 16 ára). Flest ungmenni á aldrinum 16-18 ára eru í framhaldsskóla og hefur Bjarmahlíð nú gert samkomulag um þróun samstarfs við alla framhaldsskólana á Norðurlandi. Skólarnir eru Framhaldsskólinn á Húsavík, Framhaldsskólinn á Laugum, Menntaskólinn á Akureyri, Menntaskólinn á Tröllaskaga, Verkmenntaskólinn á Akureyri og Fjölbrautarskóli Norðurlands vestra.

Fimmtudaginn 1. desember kl. 16.30 fer fram ljósaganga í tilefni 16 daga átaks gegn kynbundnu ofbeldi. Þann 25. nóvember var alþjóðlegur baráttudagur gegn ofbeldi á konum og 10. desember er hinn alþjóðlegi mannréttindadagur. Markmið átaksins er að knýja á um afnám alls ofbeldis.

Mánudaginn 21. nóvember var haldið í Hríseyjarskóla afar vel sótt málþing um umhverfisvernd og plastmengun í hafi. Málþingið var hluti af Erasmus+ verkefni sem fræðafólk við Kennaradeild Háskólans á Akureyri og nemendur við Hríseyjarskóla taka þátt í og snýst um að koma á samstarfi á milli eyjaskóla í Evrópu um nýsköpun í menntun sem stuðli að aukinni sjálfbærni í eyjasamfélögum.

Þrír krakkar úr Giljaskóla unnu til verðlauna í teiknisamkeppni sem sendiráð Bretlands á Íslandi hélt nýverið í tengslum við útgáfu bókarinnar "Tæknitröll og íseldfjöll" eftir breska sendiherrann Dr. Bryony Mathew. Verðlaunahafarnir eru Aleksandra Staniszewska, Nökkvi Freyr Hjálmarsson og Vigdís Anna Sigurðardóttir öll í 7. bekk.

Akureyrarbær auglýsir eftir umsóknum í Menningarsjóð fyrir árið 2023. Umsóknarfrestur allra umsókna rennur út á miðnætti á morgun, miðvikudaginn 23. nóvember.

Hátíðleg stund verður á Ráðhústorginu kl. 16 á laugardag þegar ljósin verða tendruð á jólatrénu.

Alþjóðadagur barna er í dag, 20. nóvember og Barnasáttmáli Sameinuðu þjóðanna á einnig afmæli.

Nú um helgina 18.-20. nóvember verður ekki hægt að senda inn nýjar rafrænar byggingarleyfisumsóknir í gegnum þjónustugátt Akureyrarbæjar.