Skólanefnd

Á fundinn mættu undir þessum lið Alfa Aradóttir forstöðumaður forvarna- og æskulýðsmála og Gréta Kristjánsdóttir forvarnafulltrúi og kynntu aðgerðaáætlun í forvörnum.

Tilkynning dags. 6. september 2010 frá mennta- og menningarmálaráðuneytinu þar sem tilkynnt er um niðurstöður úttektar á leikskólanum Iðavelli. Fyrir fundinum lá skýrsla um niðurstöðurnar. Kristlaug Þ. Svavarsdóttir skólastjóri leikskólans kynnti niðurstöðurnar sem eru að leikskólinn Iðavöllur uppfyllir þau ákvæði sem fram koma í þeim viðmiðum sem lögð voru til grundvallar. Þetta á við um aðstöðu og búnað leikskólans, stjórnunarhætti og samskipti innan leikskólans og við aðila utan hans. Helstu styrkleikar í starfi leikskólans felast í sveigjanlegum starfsháttum, styrkri stjórn og upplýsingamiðlun. Sérstaða leikskólans felst í faglegu uppeldis- og menntastarfi sem tekur mið af því að gefa börnum fjölbreytt tækifæri til að læra með því að uppgötva og reyna sjálf í gegnum leik. Á Iðavelli ríkir jákvæður og góður starfsandi og starfsmenn bera traust til stjórnenda leikskólans. Foreldrar eru einnig ánægðir með samstarf og áherslur í leikskólastarfinu og telja að börnunum líði vel. Það sem betur má fara er að skólanámskrá þarf að vera markvissari m.t.t. markmiða, leiða og í daglegu starfi, innra mat leikskólans þarf að vera markvissara og sýnilegra og framsetning og innihald skriflegra gagna þarf að vera markvissara.

Erindi dags. 18. nóvember 2010 frá Sigríði Ósk Jónasdóttur leikskólastjóra f.h. starfsmanna Flúða þar sem óskað er eftir heimild skólanefndar til að færa til fyrirfram ákveðinn skipulagsdag 3. janúar, starfsmannafundi 28. febrúar og 6. maí og námskeiðsdag 26. apríl 2011 vegna fyrirhugaðrar námsferðar starfsmanna til Västerås í Svíþjóð, dagana 18.- 20. apríl 2011.

Erindi dags. 30. nóvember 2010 frá skólastjóra leikskólans Pálmholts, þar sem óskað er eftir því að skólanefnd samþykki þær breytingar á skóladagatali 2010-2011 að starfsdagar sem vera áttu dagana 3. janúar og 26. apríl verði dagana 15. og 16. júní 2011 vegna námsferðar starfsmannahópsins til Svíþjóðar. Fram kemur að stjórn foreldrafélags og foreldraráð skólans hafa samþykkt þessa breytingu.

Fyrir fundinn voru lagðar fram til kynningar nýjar "Viðmiðunarreglur um greiðslur vegna nemenda sem stunda nám utan lögheimilissveitarfélags", sem
samþykktar voru af stjórn Sambands íslenskra sveitarfélaga 29. október 2010.

Lagður fram til kynningar og umræðu tölvupóstur frá mennta- og menningarmálaráðuneytinu þar sem fram kemur að drög að nýrri aðalnámskrá hafa verið birt ásamt sameiginlegum inngangskafla fyrir leikskóla, grunnskóla og framhaldsskóla. Ráðuneytið telur mikilvægt að fá viðbrögð hagsmunaaðila við drögunum áður en gengið verður endanlega frá þeim til útgáfu. Veittur er frestur til 20. desember nk. til að senda inn athugasemdir.

Tölvupóstur dags. 12. október 2010 þar sem Ólafía Kristín Guðmundsdóttir óskar eftir því að greinargerð um störf hennar sem félagsráðgjafa í Glerárskóla verði lögð fyrir skólanefnd. Greinargerðin fjallar um störf hennar sem félagsráðgjafa í Glerárskóla og sýn hennar á mikilvægi þess að veita þessa þjónustu. Greinargerðin er send í fullu samráði við og með stuðningi stjórnenda í Glerárskóla enda sjá þau einnig þörfina fyrir starf félagsráðgjafa.

Fyrir fundinn var lögð fram til kynningar töluleg ársskýrsla leikskóla 2010. Allar tölur í skýrslunni miðast við stöðuna 1. október 2010.

Erindi dags. 22. september 2010 þar sem Árni Sigurbjarnarson formaður stjórnar fagráðs tónlistarskóla óskar eftir tilnefningum sveitarfélaga inn í fagráð tónlistarskóla.

Fyrir fundinn voru lagðar fram til kynningar og umræðu fundargerðir almannaheillanefndar frá september til október 2010.

Á fundinum var gerð grein fyrir framvindu verkefnisins frá síðasta fundi.
Umræður.