Samningur milli Sjúkratrygginga Íslands og Akureyrarbæjar um þjónustu Öldrunarheimila Akureyrar

Samkvæmt rammasamningi milli Sjúkratrygginga Íslands (SÍ) og Akureyrarbæjar frá 2016 og þróunarsamningi frá júní 2019 fellur samningur um rekstur Akureyrarbæjar á hjúkrunarheimilum úr gildi 31. desember 2020. Samkvæmt samningi er heimilt að framlengja samninginn tvisvar sinnum um eitt ár.

Bæjarráð samþykkir með fimm samhljóða atkvæðum að tilkynna Sjúkratryggingum Íslands og heilbrigðisráðherra að bærinn mun ekki óska eftir framlengingu á rekstrarsamningi milli SÍ og Akureyrarbæjar um rekstur hjúkrunarheimilanna og óskar eftir viðræðum um framtíðarrekstur hjúkrunarheimila og dagþjónustu á Akureyri, innan 30 daga frá tilkynningu þessari.

Það er von Akureyrarbæjar að þegar Sjúkratryggingar Íslands taka yfir rekstur hjúkrunarheimilanna um næstu áramót verði tryggt að þjónustan skerðist ekki frá því sem nú er, frekar að hún verði efld.

Bæjarráð ítrekar óskir um viðræður sbr. bókun á fundi 30. apríl 2020 og

felur bæjarstjóra að óska eftir fundi með forstjóra Sjúkratrygginga Íslands sem fyrst.

Bæjarráð skipar Guðmund Baldvin Guðmundsson formann bæjarráðs, Ásthildi Sturludóttur bæjarstjóra og Ingu Þöll Þórgnýsdóttur bæjarlögmann í viðræðuhóp vegna formlegra samninga um yfirtöku SÍ á rekstri Öldrunarheimila Akureyrar.

Öldungaráð telur mikilvægt að vernda þá góðu þjónustu sem byggð hefur verið upp á Öldrunarheimilum Akureyrar og fylgst verði með þróun samninga og gæði þjónustu eftir yfirfærslu.

Bæjarráð harmar þann drátt sem orðið hefur á yfirtöku ríkisins á rekstri Öldrunarheimila Akureyrar (ÖA). Með bréfi dagsettu 5. maí sl. var heilbrigðisráðherra og Sjúkratryggingum Íslands (SÍ) tilkynnt að sveitarfélagið myndi ekki óska eftir endurnýjun á rekstrarsamningi um ÖA, með gildistíma til 31. desember 2020. Var bréf þetta byggt á ákvörðun bæjarráðs frá 30. apríl. Í kjölfarið hófust viðræður milli aðila og á fundi forstjóra SÍ og forstjóra Heilbrigðisstofnunar Norðurlands (HSN), þann 18. ágúst, með fyrirsvarsmönnum Akureyrarbæjar og ÖA ásamt trúnaðarmönnum og forsvarsmönnum stéttarfélaga starfsmanna, var tilkynnt formlega að HSN hefði verið falið að taka yfir rekstur ÖA frá og með næstu áramótum. Nú þegar árið er að renna sitt skeið hefur lítið þokast í málinu af hálfu ríkisins þrátt fyrir ítrekanir og eftirrekstur af hálfu Akureyrarbæjar. Vegna þeirrar stöðu sem upp er komin telur bæjarráð rétt, með hagsmuni skjólstæðinga og starfsfólks ÖA í huga, að samþykkja framlagðan viðauka við þjónustusamning um tímabundna framlengingu þjónustu til loka aprílmánaðar 2021. Bæjarráð ítrekar hins vegar að hér er um tímabundinn samning að ræða og væntir þess að með því gefist SÍ færi á að ljúka yfirtöku rekstrar ÖA með sómasamlegum hætti. Bæjarráð felur bæjarstjóra og rekstrarráði ÖA að fylgja málinu eftir.

Öldungaráð lýsir yfir áhyggjum á stöðu viðræðna og þeirri óvissu sem ríkir.

Öldungaráð ítrekar bókun frá 31. ágúst 2020 um að mikilvægt sé að vernda þá góðu þjónustu sem byggð hefur verið upp á Öldrunarheimilum Akureyrar og að fylgst verði með samningum og gæðum þjónustu eftir yfirfærslu. Einnig beinir ráðið því til bæjarstjórnar, ef ekki þarf lengur að leggja stórfé í rekstur öldrunarheimila, að þjónusta við eldri borgara sem bærinn ber ábyrgð á t.d. heimaþjónusta og félagsstarf verði bætt. Einnig verði orðið við ýmsum tillögum öldungaráðs, sem snúa að heilsueflingu eldri borgara.

Bæjarráð þakkar Heiðari fyrir komuna á fundinn.

Öldungaráð þakkar fyrir veittar upplýsingar.