Bæjarráð

Meirihluti bæjarráðs samþykkir að farið verði í enduruppbyggingu á álmum A og B í Lundarskóla sbr. framlagt minnisblað. Meirihluti bæjarráðs tekur undir bókun fræðsluráðs frá 15. júní sl. þar sem fram kemur að í ljósi fyrirliggjandi gagna taka endurbætur stystan tíma og raska þar með skólastarfi minnst auk þess sem þær munu fullnægja þörfum nútíma skólastarfs. Endurbætur á skólanum eru hagkvæmasti kosturinn bæði út frá fjármagni og faglegum forsendum skólastarfs.

Meirihluti bæjarráðs felur sviðsstjóra umhverfis- og mannvirkjasviðs að vinna málið áfram og í framhaldinu að leggja fram tillögu að viðauka vegna framkvæmdanna á árinu 2020 og samhliða því að endurskoða, í samstarfi við sviðsstjóra fjársýslusviðs, framkvæmdaáætlun áranna 2021-2023 í samræmi við umræður á fundinum. Jafnframt samþykkir meirihluti bæjarráðs að fela sviðsstjóra fjársýslusviðs að útbúa viðauka að fjárhæð 150 milljónir króna vegna bráðabirgðaaðgerða sem ráðast þarf í svo hægt verði að halda upp skólastarfi veturinn 2020-2021. Enn fremur felur meirihluti bæjarráðs sviðsstjóra fræðslusviðs að kynna ákvörðun bæjarráðs fyrir skólaráði Lundarskóla og ungmennaráði.


Gunnar Gíslason D-lista greiðir atkvæði á móti og leggur fram eftirfarandi bókun:

Ég greiði atkvæði gegn þeirri ákvörðun meirihluta bæjarráðs að farið verði í endurbyggingu á A og B álmu Lundarskóla. Ég tel að það sé ekki forsvaranlegt að leggja í áætlaðan kostnað við endurbyggingu í ljósi þeirra upplýsinga sem fyrir liggja um ástand bygginganna. Það er margt sem bendir til þess að kostnaður verði mun meiri en áætlaður er. Ég tel að miðað við þær upplýsingar sem ég hef aflað mér um kostnað við nýbyggingu verði heildarkostnaður endurbóta við A og B álmu ríflega 80% af þeim kostnaði. Það sem er alvarlegt að mínu mati er að áfram verður helmingur af kennslurými Lundarskóla í kjallara, þótt grafið verði frá honum að hluta og ekki er tryggt að núverandi vandi verði leystur til frambúðar. Það eru til lausnir til að brúa skólahald á meðan eldri byggingar eru rifnar og nýjar byggðar sem geta verið mjög ásættanlegar í takmarkaðan tíma. Það er ekkert sem bendir til þess að það hafi neikvæð áhrif á faglegt skólastarf þótt skólastarfið fari fram í bráðabirgðahúsnæði um tíma. Þar má benda á framsækið skólastarf í Norðlingaskóla sem um margra ára skeið var rekið í bráðabirgðaaðstöðu. Það að fara í nýbyggingu getur þýtt það að skólastarfið þarf að vera einu til tveimur árum lengur í bráðabirgðahúsnæði en það tel ég réttlætanlegan „fórnarkostnað“ sé horft til lengri tíma. Ég hef einnig verulegar áhyggjur af því að það muni dragast úr hömlu að ný leikskólabygging verði reist í stað Lundarsels þar sem það væri kjörið tækifæri til að byggja eitt og sama húsið yfir leik- og grunnskólann og ná þannig fram bæði samlegð og hagræði.

Þá hef ég áhyggjur af því að þessi ákvörðun meirihlutans hafi ekki verið kynnt foreldrum, starfsfólki og skólaráði með nægjanlega skýrum hætti áður en hún var tekin.

Bæjarráð samþykkir með fimm samhljóða atkvæðum að greiða framlag skv. samningi enda er gert ráð fyrir því í fjárhagsáætlun ársins.

Bæjarráð vísar erindinu til gerðar fjárhagsáætlunar 2021.

Bæjarráð samþykkir með fimm samhljóða atkvæðum að hafin verði nauðsynleg undirbúningsvinna til að hefja rafræna varðveislu skjala þann 1. janúar 2022. Jafnframt felur bæjarráð bæjarstjóra að óska eftir samstarfi sveitarfélaga sem aðild eiga að héraðsskjalasöfnum um rekstur móttökuverkstæðis fyrir vörsluútgáfur.

Bæjarráð Akureyrarbæjar telur ákaflega mikilvægt að Háskólanum á Akureyri verði gert kleift að taka á móti öllum þeim nemendum sem sækja um nám við skólann í haust og uppfylla inntökuskilyrði. Bæjarráð fagnar því yfirlýsingum ríkisstjórnarinnar um að fjármagn verði tryggt til að svo megi verða. Aðgengi að háskólum verður að vera opið öllum landsmönnum óháð búsetu og gegnir þar Háskólinn á Akureyri lykilhlutverki enda mikill og eftirsóknarverður árangur náðst við HA við innleiðingu sveigjanlegs náms. Bæjarráð minnir á að rúmlega 60% nemenda HA eru utan höfuðborgarsvæðisins og hafa rannsóknir sýnt að nemendur sem ljúka námi í heimabyggð eru mun líklegri til að starfa þar fimm árum eftir brautskráningu.

Bæjarráð tilnefnir Höllu Björk Reynisdóttur og Þórhall Jónsson sem aðalfulltrúa í stjórn Vetraríþróttamiðstöðvar Íslands og Andra Teitsson og Þórunni Sif Harðardóttur til vara.

Bæjarráð felur Kristni J. Reimarssyni að fara með umboð Akureyrarbæjar á fundinum.