Velferðarráð

1256. fundur 16. ágúst 2017 kl. 14:00 - 16:45 Fundarsalur á 2. hæð í Glerárgötu 26
Nefndarmenn
  • Erla Björg Guðmundsdóttir formaður
  • Róbert Freyr Jónsson
  • Halldóra Kristín Hauksdóttir
  • Svava Þórhildur Hjaltalín
  • Valur Sæmundsson
  • Guðrún Karitas Garðarsdóttir áheyrnarfulltrúi
Starfsmenn
  • Guðrún Ólafía Sigurðardóttir sviðsstjóri fjölskyldusviðs
  • Halldór Sigurður Guðmundsson framkvæmdastjóri
  • Jón Hrói Finnsson sviðsstjóri búsetusviðs
  • Anna Marit Níelsdóttir forstöðumaður í félagsþjónustu
  • Bryndís Dagbjartsdóttir fundarritari
Fundargerð ritaði: Bryndís Dagbjartsdóttir
Dagskrá

1.Fjárhagserindi 2017 - áfrýjanir

2017010078

Snjólaug Jóhannesdóttir félagsráðgjafi kynnti áfrýjun í fjárhagsaðstoð.
Fjárhagserindi og afgreiðsla þeirra færð í trúnaðarbók velferðarráðs.

2.Sérstakur húsnæðisstuðningur - reglur

2016120021

Lagðar fram tillögur að breytingum á reglum um sérstakan húsnæðisstuðning.
Ákvörðun frestað til næsta fundar.

3.Leiguíbúðir Akureyrarbæjar - leiguverð

2012110070

Tekin fyrir að nýju tillaga um að hækka leiguverð í leiguíbúðum Akureyrarbæjar. Málið var áður á dagskrá í velferðarráði 24. maí og 7. júní og í bæjarráði 22. og 29. júní sl.
Ákvörðun frestað.

4.Fundaáætlun velferðarráðs

2015060008

Lögð fram fundaáætlun velferðarráðs fyrir ágúst til desember 2017.
Velferðarráð samþykkir framlagða fundaáætlun.

5.Velferðarstefna 2014-2018

2015010191

Lögð fram uppfærð drög að velferðarstefnu. Umræður um framhald stefnumótunarvinnu og áætluð verklok.
Farið yfir stöðu verkefnisins. Velferðarráð samþykkir að halda aukafund um málið þann 12. september nk. kl.15:00.

6.ÖA-stefna og starfsemi

2013010214

Framkvæmdastjóri Öldrunarheimila Akureyrar, Halldór S. Guðmundsson, upplýsti um ráðningu Sigurlínu Stefánsdóttur hjúkrunarfræðins sem forstöðumanns við Aspar- og Beykihlíð. Sigurlína tekur við starfinu frá og með 25. ágúst nk. af Brynju Vignisdóttur.

7.Stefna og áherslur í málefnum einstaklinga með heilabilun/Alzheimer

2017080028

Framkvæmdastjóri Öldrunarheimila Akureyrar, Halldór S. Guðmundsson, greindi frá samstarfi starfsmanna ÖA við Alzheimersamtökin um að halda fjögur málþing. Málþingið á Akureyri var haldið 7. apríl sl. og var fjölsótt. Þar var m.a. fjallað um og kallað eftir aukinni fræðslu, ráðgjöf og stuðningi við aðstandendur og fjölskyldur einstaklinga með heilabilun, líkt og það fyrirkomulag sem þekkist frá norðurlöndunum þar sem ráðgjafar á sviði heilabilunar starfa innan velferðarþjónustu sveitarfélaganna.

Framkvæmdastjóri ÖA reifaði vaxandi þörf og mikilvægi ráðgjafar og stuðnings við fjölskyldur í þessum málum og velti upp hugmyndum um að stofna til slíkrar ráðgjafar innan velferðarsviðs Akureyrar.
Velferðarráð þakkar kynninguna.

8.ÖA - stefna og starfsemi

2013010214

Framkvæmdastjóri Öldrunarheimila Akureyrar, Halldór S. Guðmundsson, gerði grein fyrir stöðu máls varðandi skipan vinnuhóps um viðhald og endurbætur á húsnæði ÖA.

Málið var áður tekið fyrir á fundum velferðarráðs þann 19. apríl og 24. maí sl. sem og á fundi umhverfis- og mannvirkjaráðs 16. júní sl. og afgreiðslu eða tilnefningu frestað.

9.Samfélagsleg ábyrgð, nýsköpun og frumkvöðlastarf í opinbera geiranum - EEN viðurkenning

2017070098

Framkvæmdastjóri Öldrunarheimila Akureyrar, Halldór S. Guðmundsson, greindi frá tilnefningu á ÖA og Alfa verkefninu til evrópskra verðlauna í opinbera geiranum. ÖA er tilnefnt fyrir hönd Íslands af hálfu Evrópumiðstöðvar Nýsköpunarmiðstöðvar Íslands.

Viðurkenningin er í flokki sem varðar "aðgerðir í tengslum við samfélagslega ábyrgð fyrirtækja og stuðla að frumkvöðlastarfsemi" og er á vegum Enterprise Europe Network (EEN) sem er samstarfsvettvangur 600 aðila í 60 löndum og er stærsta tækniyfirfærslu- og viðskiptanet sinnar tegundar (sjá www.een.is).

Með tilnefningunni telst ÖA vera "national winner" og getur af því tilefni flaggað árangrinum með "2017 EEPA National winner logo" á heimasíður og öðrum miðlum.

Niðurstaða tilnefningarinnar og samkeppninnar verður síðan kynnt á verðlaunaafhendingu í Tallinn þann 23. nóvember 2017.
Velferðarráð óskar starfsfólki og stjórnendum Öldrunarheimila Akureyrar innilega til hamingju með þá viðurkenningu sem í tilnefningunni felst.

10.Beiðni um kaup á íbúðum fyrir fólk með mikla þjónustuþörf

2017060138

Eigandi tveggja íbúða sem Akureyrarbær er með á leigu og leigir áfram til skjólstæðinga sem njóta umtalsverðs stuðnings hefur sagt leigusamningunum upp. Því liggur fyrir að finna þarf leigjendunum nýtt húsnæði fyrir 1. apríl 2018. Mat starfsmanna umhverfis- og mannvirkjasviðs og fjölskyldusviðs er að hagkvæmasta lausnin sé að kaupa íbúðir í stað þeirra sem leigðar eru í dag. Áætlað verð er 60 m.kr.
Velferðarráð óskar eftir því við bæjarráð að veitt verði heimild til kaupa á tveimur íbúðum fyrir allt að 60 m.kr.

11.Lífsleikni fyrir ungt fatlað fólk

2017060136

Jón Hrói Finnsson sviðsstjóri búsetusviðs lagði fram tillögu að nýju þjónustuúrræði fyrir ungt fatlað fólk sem hefur lokið námi í framhaldsskóla. Um er að ræða þjálfun í lífsleikni til að búa þátttakendur undir búsetu á eigin vegum.

Kostnaður er áætlaður um 2,3 m.kr. á árinu 2017 og um 6,8 m.kr. á árinu 2018 vegna ráðningar tveggja starfsmanna í hlutastörf, samtals um 1 stöðugildi.
Velferðarráð fagnar tillögunni og samþykkir hana fyrir sitt leyti og leggur til við bæjarráð að heimild til ráðningar starfsmanna verði veitt og umbeðnu viðbótarfjármagni veitt til reksturs Skammtíma- og skólavistunar (1025650) í fjárhagsáætlun ársins 2018.

12.Skammtímavistun 2017-2018

2017060214

Lögð fram tillaga að lengdum opnunartíma Skammtímavistunar til að mæta fjölgun notenda og vaxandi þörf notenda fyrir þjónustuna. Í tillögunni er gert ráð fyrir ráðningu í 1,96 stg. þ.a. 0,55 stg. fagmanns sem tæki þátt í skipulagningu og gerð einstaklingsáætlana.

Áætlaður heildarkostnaður við fullnýtingu húsnæðis Skammtíma- og skólavistunar er um 18,2 m.kr. en á móti er reiknað með um 14,4 m.kr. framlagi úr Jöfnunarsjóði sveitarfélaga vegna barna með miklar þjónustuþarfir sem færast á liðinn Skatttekjur í bókhaldi. Útgjaldaauki umfram tekjuauka er því um 3,9 m.kr. á ársgrundvelli.

Velferðarráð samþykkir tillöguna fyrir sitt leyti og leggur til við bæjarráð að heimild til ráðningar starfsmanna verði veitt og að 18,2 m.kr. verði veitt til aukins reksturs Skammtíma- og skólavistunar (1025650) í fjárhagsáætlun ársins 2018.

Fundi slitið - kl. 16:45.