Sundlaug Akureyrar - opnunartímar

Íþróttaráð óskar eftir áliti stjórnar Akureyrarstofu varðandi opnunartíma Sundlaugar Akureyrar um jól og áramót m.t.t. ferðaþjónustu. Forstöðumanni íþróttamála falið að leita nánari upplýsinga hjá forstöðumanni Sundlaugar Akureyrarbæjar um kostnað.

Íþróttaráð hefur tekið ákvörðun um að ekki verði bætt við opnunartíma Sundlaugar Akureyrar um jól og áramót 2012. Skoðaðir verða möguleikar á slíkum opnunum á næsta ári.

Stjórn Akureyrarstofu telur ljóst að ekki verði ráðist í umfangsmiklar framkvæmdir af hálfu Akureyrarbæjar á næstu árum sem munu nýtast ferðaþjónustunni í bænum með beinum hætti. Í því ljósi er mikilvægt að fyrirtæki og stofnanir bæjarins sem koma að þjónustu við ferðamenn séu tilbúin til að aðlaga þjónustu og afgreiðslutíma að þörfum þeirra. Þetta á ekki síst við utan háannatíma í ferðaþjónustunni en fjölmargir aðilar vinna nú að eflingu ferðaþjónustunnar yfir vetrartímann.

Stjórn Akureyrastofu telur því mikilvægt að íþróttaráð og stjórnendur Sundlaugarinnar verði undir það búin að auka afgreiðslutímann í skrefum á næstu misserum og árum í takti við aukna sókn ferðamanna til Norðurlands.

Íþróttaráð samþykkir að í tilraunaskyni verði Sundlaug Akureyrar opin á annan í jólum 2013.

Anna Jenný Jóhannsdóttir áheyrnarfulltrúi D-lista óskar bókað: Ég mótmæli ákvörðun ráðsins varðandi opnun á annan í jólum 2013, krafan um opnunina kemur aðallega frá aðilum innan ferðaþjónustunnar, en fjöldi ferðamanna á svæðinu yfir hátíðarnar er ekki nægilegur til að nauðsynlegt sé að hafa opið þennan eða annan af þremur dögum sem lokað er um jól og áramót.

Íþróttaráð samþykkir að hafa opið í Sundlaug Akureyrar á annan í jólum framvegis.

Íþróttaráð felur forstöðumanni íþróttamála og forstöðumanni Sundlaugar Akureyrar að kostnaðargreina hugmyndir um að hafa Sundlaug Akureyrar opna 1. maí, 17. júní og næturopnun í kringum Jónsmessu.

Íþróttaráð samþykkir að hafa miðnæturopnun í tengslum við Jónsmessu í tilraunaskyni í Sundlaug Akureyrar.

Íþróttaráð leggur til að föstudagurinn 20. júní 2014 verði fyrir valinu og felur forstöðumanni Sundlaugar Akureyrar að útfæra málið.