Bæjarráð

3303. fundur 12. janúar 2012 kl. 09:00 - 11:17 Bæjarstjórnarsalur á 4. hæð í Ráðhúsi
Nefndarmenn
  • Oddur Helgi Halldórsson formaður
  • Geir Kristinn Aðalsteinsson
  • Halla Björk Reynisdóttir
  • Hermann Jón Tómasson
  • Ólafur Jónsson
  • Andrea Sigrún Hjálmsdóttir áheyrnarfulltrúi
  • Guðmundur Baldvin Guðmundsson áheyrnarfulltrúi
  • Sigurður Guðmundsson áheyrnarfulltrúi
Starfsmenn
  • Eiríkur Björn Björgvinsson bæjarstjóri
  • Dan Jens Brynjarsson fjármálastjóri
  • Jón Bragi Gunnarsson hagsýslustjóri
  • Heiða Karlsdóttir fundarritari
Dagskrá

1.Álagning gjalda - fasteignagjöld 2012 - reglur um afslátt af fasteignaskatti

2011110100

Lögð fram tillaga að reglum um afslátt elli- og örorkulífeyrisþega af fasteignaskatti 2012.

Bæjarráð samþykkir tillöguna og vísar henni til afgreiðslu bæjarstjórnar.

2.Sérstakar húsaleigubætur - breyting á reglum

2012010101

Lögð fram tillaga um breytingu á reglum um sérstakar húsaleigubætur á Akureyri.

Bæjarráð samþykkir tillöguna og vísar henni til afgreiðslu bæjarstjórnar.

3.Byggðakvóti handa Hrísey og Grímsey - fiskveiðiárið 2011/2012

2011100112

Lagt fram til kynningar bréf dags. 21. desember 2011 frá sjávarútvegs- og landbúnaðarráðuneytinu þar sem tilkynnt er um úthlutaðan byggðakvóta fiskveiðiársins 2011/2012, 102 þorskígildistonn vegna Hríseyjar og 15 þorskígildistonn vegna Grímseyjar.
Í bréfinu er einnig vakin athygli á því að vilji sveitarstjórn leggja til við ráðuneytið að sett verði sérstök skilyrði varðandi úthlutun byggðakvóta sveitarfélagsins eða einstakra byggðalaga skal hún skila rökstuddum tillögum sínum til ráðuneytisins eigi síðar en 20. janúar 2012.

Bæjarráð tekur undir bókun hverfisráðs Grímseyjar frá fundi 10. janúar 2012 og lýsir vonbrigðum með hversu lítill byggðakvóti kemur í hlut Grímseyinga.

4.Áheyrnarfulltrúar skv. nýjum sveitarstjórnarlögum

2011120022

Ákvæði í nýjum sveitarstjórnarlögum um áheyrnarfulltrúa í nefndum skv. 50. og 51. gr. laganna.
Tekið fyrir að nýju, áður á dagskrá bæjarráðs 8. desember 2011.

Bæjarráð samþykkir að greiða áheyrnarfulltrúum í öllum fastanefndum í samræmi við reglur um laun bæjarfulltrúa og nefndarmanna hjá Akureyrarbæ.

5.Þórunnarstræti 99 - Húsmæðraskólinn - ráðstöfun eignar

2012010071

Erindi dags. 4. janúar 2012 frá Ólafi Halldórssyni framkvæmdastjóra Háskólans á Akureyri varðandi ráðstöfun fasteignarinnar Þórunnarstræti 99.

Bæjarráð frestar afgreiðslu og felur fjármálastjóra að vinna áfram að málinu.

6.Morgunverður í leikskólum Akureyrarbæjar

2012010080

6. liður í fundargerð skólanefndar dags. 9. janúar 2012:
Meirihluti skólanefndar lagði fram þá tillögu á fundinum, að fresta fyrirhuguðum breytingum á morgunverði í leikskólum Akureyrarbæjar sem samþykktar voru í fjárhagsáætlun 2012. Þá var einnig lagt til að leitað yrði samráðs við foreldraráð, stjórnendur og starfsmenn leikskóla um það hvaða breytingar verði gerðar og hvernig þeim verði best hrint í framkvæmd.
Skólanefnd samþykkir að vísa málinu til bæjarráðs.
Anna Sjöfn Jónasdóttir óskar að eftirfarandi sé bókað:
Mótmæli vinnubrögðum bæjarfulltrúa L-listans með frestun gildistöku fyrirhugaðrar breytingar á morgunverði í leikskólum Akureyrarbæjar, þar sem gengið var þvert á ákvörðun skólanefndar og án samráðs við nefndina.

Meirihluti bæjarráðs samþykkir tillögu meirihluta skólanefndar um að fresta gildistöku breytinga á morgunverði í leikskólum bæjarins.

Hermann Jón Tómasson S-lista og Ólafur Jónsson D-lista sátu hjá við afgreiðslu.

Hermann Jón og Ólafur óska bókað:

Við teljum að ákvörðun um breytingar á morgunverði í leikskólum hafi verið misráðin og fögnum því að L-listinn hafi séð að sér í þessu máli. Hins vegar voru vinnubrögð bæjarfulltrúa L-listans í þessu máli óforsvaranleg eins og viðbrögð fulltrúa þeirra í skólanefnd sýna.

Þess vegna sitjum við hjá við afgreiðslu.

7.Önnur mál

2012010085

a) Bann við svartfuglsveiðum
Bæjarráð tekur undir mótmæli hverfisráðs Grímseyjar frá fundi 10. janúar 2012 um fyrirhugað bann við svartfuglsveiðum næstu 5 árin og skorar á umhverfisráðherra að taka tillit til sérstöðu Grímseyjar.

b) Auknar álögur á innanlandsflugið
Bæjarráð Akureyrar mótmælir frekari álögum ríkisins á innanlandsflugið.
Bæjarráð telur að hér sé um hreinan landsbyggðarskatt að ræða og skorar á stjórnvöld að endurskoða þessa ákvörðun.

c) Vaðlaheiðargöng
Rætt um stöðuna varðandi framkvæmdir við Vaðlaheiðargöng.

Fundi slitið - kl. 11:17.