Bæjarráð

Umræður um ferjusiglingar til Hríseyjar og Grímseyjar.

Guðmundur Helgason forstöðumaður greiningadeildar Vegagerðarinnar, Ásta Þorleifsdóttir sérfræðingur hjá innanríkisráðuneytinu og Helga Íris Ingólfsdóttir verkefnastjóri Brothættra byggða í Hrísey og Grímsey sátu fund bæjarráðs undir þessum lið.

Unnið að gerð fjárhagsáætlunar.

Ingibjörg Ólöf Ísaksen formaður íþróttaráðs, Silja Dögg Baldursdóttir formaður samfélags- og mannréttindaráðs og Unnar Jónsson formaður stjórnar Akureyrarstofu sátu fund bæjarráðs undir þessum lið auk Ellerts Arnars Erlingssonar framkvæmdastjóra samfélags- og mannréttindadeildar og Þórgnýs Dýrfjörð framkvæmdastjóra Akureyrarstofu.

Dan Jens Brynjarsson fjármálastjóri og Jón Bragi Gunnarsson hagsýslustjóri sátu einnig fund bæjarráðs undir þessum lið auk bæjarfulltrúans Evu Hrundar Einarsdóttur D-lista.

Lagður fram viðauki nr. 3.

Jón Bragi Gunnarsson hagsýslustjóri og Dan Jens Brynjarsson fjármálastjóri sátu fund bæjarráðs undir þessum lið.

Umræður um nýlegan úrskurð kjararáðs um þingfararkaup.

Halla Margrét Tryggvadóttir starfsmannastjóri sat fund bæjarráðs undir þessum lið.

Umræður um tillögur vinnuhóps um íbúalýðræði og gagnsæja stjórnsýslu.

1. liður í fundargerð skipulagsnefndar dagsett 5. október 2016:

Lögð voru fram drög að greinargerð Aðalskipulags Akureyrar 2018-2030 dagsett 30. september 2016, þéttbýlisuppdrætti dagsett 26. september 2016 og uppdrætti fyrir Hrísey og Grímsey dagsett 29. september 2016. Frestað frá síðasta fundi.

Skipulagsnefnd samþykkir að aðalskipulagsdrögin, með breytingum í samræmi við umræður á fundinum, verði send til umsagnar innan bæjarkerfisins og jafnframt til hverfisráða Hríseyjar og Grímseyjar með 5 vikna umsagnarfresti.

Lagður fram til kynningar 4. liður í fundargerð stjórnar Akureyrarstofu dagsett 27. október 2016:

Lagður fram til staðfestingar endurnýjaður samstarfssamningur sem undirritaður var af menntamálaráðherra og bæjarstjóranum á Akureyri þann 26. október sl. Um er að ræða endurnýjun eldri samnings en menningarsamstarfið teygir sig allt aftur til ársins 1997. Samningurinn nær til yfirstandandi árs og ársins 2017. Meginmarkmið með samningnum er að efla hlutverk Akureyrar sem miðju utan höfuðborgarsvæðisins í lista- og menningarlífi á Íslandi og stuðla að auknu atvinnustarfi í listum á Akureyri. Þetta er gert með stuðningi við meginstofnanir á sviði leiklistar, myndlistar og tónlistar. Samningurinn nær til reksturs Leikfélags Akureyrar, Sinfóníuhljómsveitar Norðurlands og Menningarhússins Hofs, en Menningarfélag Akureyrar hefur rekstur þeirra með höndum um þessar mundir, og einnig nær samningurinn til reksturs Listasafnsins á Akureyri. Fjárveitingar ríkisins til samningsins hækka úr 138 mkr. árið 2015 í 168 mkr. árið 2016. Á seinna ári hans hækkar framlagið sem nemur áætlaðri hækkun verðlags og verður 172,2 mkr. árið 2017.

Stjórn Akureyrarstofu staðfestir samninginn fyrir sitt leyti.

Lagt fram til kynningar bréf dagsett 31. október 2016 frá atvinnuvega- og nýsköpunarráðuneytinu þar sem tilkynnt er um úthlutaðan byggðakvóta fiskveiðiársins 2016/2017, 158 þorskígildistonn vegna Hríseyjar og 62 þorskígildistonn vegna Grímseyjar.

Í bréfinu kemur fram að vilji sveitarstjórn leggja til við ráðuneytið að sett verði sérstök skilyrði varðandi úthlutun byggðakvóta sveitarfélagsins eða einstakra byggðalaga skal hún skila rökstuddum tillögum sínum til ráðuneytisins eigi síðar en 30. nóvember 2016.

Lagt fram til kynningar bréf dagsett 4. nóvember 2016 frá formanni kjörstjórnar Akureyrarkaupstaðar, Helgu G. Eymundsdóttur. Í bréfinu kemur fram að í Alþingiskosningunum sem fram fóru þann 29. október sl. þá hafi kjörfundur hafist á öllum kjörstöðum Akureyrarkaupstaðar kl. 09:00 og lauk kl. 22:00 á Akureyri, kl. 10:30 í Grímsey og kl. 18:00 í Hrísey.

Á kjörskrá voru 13.941 en á kjörstað á kjördag kusu 9.038. Utan kjörfundar greiddu atkvæði 1.816 þannig að samtals greiddu 10.854 atkvæði og kosningaþátttakan 77,86% sem er undir meðallagi miðað við undanfarin ár á Akureyri.

Kjörfundur gekk mjög vel og sem endranær telur kjörstjórn ástæðu til að hrósa öllu starfsfólki sérstaklega fyrir þeirra framlag til kosninganna, en að venju var fumlaus framkoma þeirra og ósérhlífni við undirbúning og framgang kosninganna sem er lykill að velheppnaðri framkvæmd þeirra.

Lögð fram til kynningar fundargerð 843. fundar stjórnar Sambands íslenskra sveitarfélaga dagsett 28. október 2016. Fundargerðina má finna á vefslóðinni: http://www.samband.is/um-okkur/fundargerdir-stjornar/searchmeetings.aspx