Stjórn Akureyrarstofu

89. fundur 03. febrúar 2011 kl. 16:00 - 18:30 Fundarherbergi Akureyrarstofu í menningarhúsinu Hofi
Nefndarmenn
  • Halla Björk Reynisdóttir formaður
  • Jón Hjaltason
  • Þórarinn Stefánsson
  • Helena Þuríður Karlsdóttir
  • Sóley Björk Stefánsdóttir
Dagskrá

1.Endurskoðun menningarstefnu Akureyrarbæjar 2011

2011020012

Endurskoðun menningarstefnunnar gengur skv. áætlun. Haft hefur verið samband við þær stofnanir, félagasamtök og aðra aðila sem koma til með að taka þátt í hugmynda- og undirbúningsvinnu fyrir nýja menningarstefnu. Undirtektir hafa verið góðar og er von á tilnefningum á næstu dögum.

Stjórn Akureyrarstofu samþykkir að fyrir hönd hennar sitji eftirtaldir í hópunum:

Sjónlist: Guðrún Þórsdóttir
Tónlist: Þórarinn Stefánsson
Sviðslist: Helena Þuríður Karlsdóttir
Menningararfur: Jón Hjaltason
Ritlist: Sóley Björk Stefánsdóttir

Ekki er gert ráð fyrir að greitt verði sérstaklega fyrir setuna í þessum vinnuhópum.

2.Starfsáætlun stjórnar Akureyrarstofu 2011-2014

2011010071

Kynnt voru frumdrög að starfsáætlun fyrir stjórn Akureyrarstofu.

3.Reglur fyrir Menningarsjóð Akureyrar - endurskoðun 2011

2011010069

Lagðar fram til samþykktar endurskoðaðar reglur um sjóðinn og vinnureglur um úthlutun úr honum. Helstu breytingar á vinnureglum eru eftirfarandi:
Auglýst er einu sinni á ári eftir umsóknum um styrki úr Menningarsjóðnum. Heimilt er að auglýsa aukaúthlutun ef fjárheimildir leyfa. Fjárhæð þeirra styrkja sem í boði eru fara eftir heimildum Menningarsjóðs í fjárhagsáætlun hverju sinni og hve hátt hlutfall styrkja er bundið tímabundnum samningum.
Framkvæmdastjóri Akureyrarstofu og verkefnisstjóri geta í sameiningu afgreitt styrki að upphæð kr. 75.000 eða lægri fyrir allt að 1 mkr. á árinu 2011. Um tvenns konar styrki getur verið að ræða:
a) Styrki til smærri menningarviðburða.
b) Ferðastyrki til listamanna frá Akureyri sem fara annað til að fremja eða sýna list sína. Skal þá m.v. að ferðastyrkur v/listviðburðar innanlands nemi 25 þús. kr. og styrkur vegna ferðar til útlanda nemi 50 þús. kr. Hver listamaður getur einungis fengið einn slíkan styrk á ári.

Stjórn Akureyrarstofu samþykkir reglurnar fyrir sitt leyti.

4.Atvinnuátaksverkefni Akureyrarbæjar og Vinnumálastofnunar 2011

2011010068

Lagðar fram til samþykktar endurskoðaðar vinnureglur um atvinnuátaksverkefni. Helstu breytingar eru að stuðningur Akureyrarbæjar við hvert verkefni getur að hámarki orðið 100 þús. kr. á mánuði auk launatengdra gjalda. Í tilfelli félagasamtaka greiðir Akureyrarbær 80% af viðbótarfjárhæðinni en félagasamtökin greiða sjálf 20%. Því getur stuðningur Akureyrarbæjar í tilfelli félagasamtaka að hámarki verið kr. 80.000. Launakostnaður umfram það greiðist af viðkomandi stofnun eða félagasamtökum.

Stjórn Akureyrarstofu samþykkir vinnureglurnar.

Fundi slitið - kl. 18:30.