Stjórn Akureyrarstofu

220. fundur 01. desember 2016 kl. 16:15 - 18:03 Fundarherbergi Akureyrarstofu í menningarhúsinu Hofi
Nefndarmenn
  • Sigfús Arnar Karlsson varaformaður
  • Anna Hildur Guðmundsdóttir
  • Hildur Friðriksdóttir
  • Sædís Gunnarsdóttir
Starfsmenn
  • Þórgnýr Dýrfjörð framkvæmdastjóri akureyrarstofu ritaði fundargerð
Dagskrá
Sædís Gunnarsdóttir S-lista mætti í forföllum Unnars Jónssonar.
Eva Hrund Einarsdóttir D-lista boðaði forföll en varamaður komst ekki í hennar stað.
Eva Dögg Fjölnisdóttir Æ-lista boðaði forföll en varamaður komst ekki í hennar stað.

1.Ferðamálastefna

2014110220

Ferðamálastefna Akureyrarbæjar lögð fram til lokaafgreiðslu.
Stjórn Akureyrarstofu samþykkir stefnuna og vísar henni til afgreiðslu í bæjarstjórn. Jafnframt þakkar stjórnin þeim fjölmörgu aðilum sem lögðu hönd á plóg við gerð stefnunnar. Sérstakar þakkir eru færðar starfsmönnum bakhóps vinnunnar, þeim Albertínu Friðbjörgu Elíasdóttur fráfarandi verkefnisstjóra atvinnumála hjá Akureyrarkaupstað og Maríu Helenu Tryggvadóttur verkefnisstjóra ferðamála á Akureyrarstofu.

2.Umhverfis- og samgöngustefna

2015010196

Óskað hefur verið eftir umsögn nefnda og ráða Akureyrarbæjar um nýja umhverfis- og samgöngustefnu. Drög að stefnunni lögð fram til kynningar.

3.Verklagsreglur um útleigu á eldra húsnæði í umsjón stjórnar Akureyrarstofu

2016110187

Unnið að verklagsreglum um útleigu og afnot af eldra húsnæði sem tilheyrir málaflokkum stjórnar Akureyrarstofu.
Framkvæmdastjóra falið að vinna áfram að málinu.

4.Karl Guðmundsson - listaverk boðið til kaups

2015060097

Erindi dagsett 8. júní 2015 frá Írisi Stefaníu Skúladóttur f.h. listahátíðarinnar Listar án landamæra, þar sem listaverk eftir Karl Guðmundsson listamann hátíðarinnar árið 2015 er boðið til kaups.
Stjórn Akureyrarstofu samþykkir að vísa erindinu til safnráðs Listasafnsins á Akureyri til afgreiðslu.

5.Minnismerki um Kristján Níels Jónsson - Káinn

2016110189

Erindi dagsett 4. nóvember 2016 frá "Káinshópnum" sem undirbýr málþing um skáldið Kristján Níels Jónsson sem fram á að fara á næsta ári. Í undirbúningnum hefur komið upp sú hugmynd að Íslendingafélögin í Norður-Dakóta í samstarfi við ættfræðihópinn "Icelandic Roots" gefi Akureyringum minnismerki um Káinn. Í erindinu er óskað staðfestingar á því að Akureyrarbær vilji þiggja þessa gjöf.
Stjórn Akureyrarstofu tekur fyrir sitt leyti jákvætt í að Akureyringar þiggi þessa gjöf. Framkvæmdastjóra falið að vinna málið áfram í samstarfi við þá aðila hjá Akureyrarbæ sem koma þurfa að því.

6.Iceland Airwaves 2017 - styrkbeiðni

2016110150

Erindi dags. 16. nóvember 2016 frá Grími Atlasyni f.h. IA tónlistarhátíðar ehf þar sem óskað er eftir stuðningi við að halda tónlistarhátíðina Iceland Airwaves á Akureyri árið 2017. Jafnframt er óskað stuðningi við verkefnið næstu tvö árin þar á eftir. Nú hefur verið tilkynnt um að hátíðin kemur til Akureyrar á næsta ári.
Stjórn Akureyrarstofu lýsir mikilli ánægju með að tónlistarhátíðin Iceland Airwaves verði haldin á Akureyri á sama tíma og í Reykjavík á næsta ári. Fyrir utan þá fjölbreytni sem hún færir menningarlífinu í bænum telur stjórn Akureyrarstofu að mikil markaðstækifæri felist í komu hátíðarinnar hingað. Á þeim grunni tekur stjórnin jákvætt í að styðja við hátíðina og felur framkvæmdastjóra að ræða við bréfritara um gerð samstarfssamning þar um.

7.Fjárhagsáætlun 2017 - stjórnar Akureyrarstofu

2016080056

Farið yfir og lögð fram til kynningar þriggja ára áætlun fyrir málaflokka stjórnar Akureyrarstofu eins og hún lítur út í tillögum bæjarráðs til bæjarstjórnar.

Fundi slitið - kl. 18:03.