Kostnaðar- og sviðsmyndagreining um uppbyggingu íþróttamannvirkja

Umhverfis- og mannvirkjaráð samþykkir að stofnaður verði verkefnahópur um kostnaðar- og sviðsmyndagreiningu um uppbyggingu á íþróttamannvirkjum á Akureyri.

Skipulagsráð samþykkir að Tryggvi Már Ingvarsson B-lista og Helgi Snæbjarnarson L-lista verði fulltrúar skipulagsráðs.

Frístundaráð samþykkir að óska eftir því við bæjarráð að skipaður verði starfshópur sbr. framlagt erindisbréf, sem m.a. hafi það hlutverk að greina gróflega stofn- og rekstrarkostnað við helstu framtíðar íþróttamannvirki. Ráðið samþykkir jafnframt að vinna hópsins verði launuð og óskar því eftir viðauka að upphæð kr. 1.794.000 við fjárhagsáætlun til að mæta þeim kostnaði.

Bæjarráð samþykkir skipan starfshópsins með 5 samhljóða atkvæðum og felur sviðsstjóra fjársýslusviðs að útbúa viðauka vegna málsins.

Frístundaráð þakkar fyrir greinargóða skýrslu og vísar henni til bæjarráðs. Jafnframt er deildarstjóra íþróttamála falið að boða til kynningarfundar með íþróttahreyfingunni mánudaginn 11. nóvember nk.

Halla Björk Reynisdóttir kynnti skýrsluna.

Í umræðum tóku til máls Gunnar Gíslason, Guðmundur Baldvin Guðmundsson, Ingibjörg Ólöf Isaksen, Sóley Björk Stefánsdóttir, Gunnar Gíslason, Hlynur Jóhannsson, Halla Björk Reynisdóttir og Þórhallur Jónsson.

Bæjarstjórn samþykkir með 11 samhljóða atkvæðum að forgangsröðun þverpólitísks hóps um uppbyggingu íþróttamannvirkja á Akureyri verði höfð til hliðsjónar við undirbúning langtíma fjárfestingaráætlunar bæjarins. Verkefnin voru metin út frá fjárhagslegum og félagslegum forsendum og endurspegla niðurstöður hópsins þá þörf sem er til staðar í bænum. Um tímamótaáætlun er að ræða þar sem horft er til framtíðar í uppbyggingu íþróttamannvirkja á Akureyri og þeim forgangsraðað. Nú þegar er búið að samþykkja fyrsta verkefnið samkvæmt áætluninni og undirbúningur hafinn á næstu tveimur. Um langtímaáætlun er að ræða og til hliðsjónar verður fjárhagsáætlun hvers tíma.