Samningur um samstarf ríkis og Akureyrarbæjar í menningarmálum

Stjórn Akureyrarstofu samþykkir tillögu ráðuneytisins fyrir sitt leyti. Stjórnin leggur hins vegar áherslu á að þegar verði látið reyna á hvort ráðuneytið taki yfir kostnað vegna skylduskila sem Amtsbókasafnið annast fyrir hönd ríkisins en Akureyrarbær tekur þátt í að greiða og að nýr 3ja ára samningur liggi fyrir eigi síðar en 1. ágúst nk. eins og endurnýjunartillagan gerir ráð fyrir.

Stjórn Akureyrarstofu fagnar því að nú er lagt upp með að gera samning til þriggja ára en gerir athugasemdir við fjárhæðir í þeim drögum sem fyrir liggja. Framkvæmdastjóra Akureyrarstofu og formanni stjórnar falið að koma þeim athugasemdum á framfæri við mennta- og menningarmálaráðuneytið og halda áfram viðræðum . Að öðru leyti telur stjórnin mikilvægt að ljúka samningum sem allra fyrst.

Stjórn Akureyrarstofu samþykkir drögin fyrir sitt leyti með þeim breytingartillögum sem fram komu á fundinum. Þær eru annars vegar að ríkið taki þátt í að koma á tímabundnum styrktarsjóði sem hafi það hlutverk að styðja við frumsköpun ungs fólks og að styrkja öfluga listræna hópa á heimaslóð til að setja verkefni sín á svið í Menningarhúsinu Hofi. Hins vegar er um að ræða ákvæði um endurskoðun á fjárhæðum samningsins í september á þessu ári.
Þá telur stjórnin mikilvægt að halda því til haga að stuðningur ríkisins við Skáldahúsin á Akureyri eru ekki inni í þessum samningi en nauðsynlegt er að finna honum fastan farveg í framhaldinu líkt og gildir gagnvart öðrum sambærilegum stofnunum á Íslandi.