Fræðsluráð

Fræðsluráð felur sviðsstjóra að vinna málið áfram með því að vísa viðeigandi atriðum áfram til hvers skóla og fylgja eftir viðbrögðum skólanna. Fræðsluráð tekur málið upp aftur m.t.t. þeirra atriða sem ráðið þarf að bregðast við.

Meirihluti fræðsluráðs staðfestir framlagða starfsáætlun fræðslusviðs fyrir árið 2021 og vísar til bæjarráðs.

Ragnheiður Lilja Bjarnadóttir L-lista sat hjá.


Ragnheiður Lilja Bjarnadóttir bókaði eftirfarandi:

Samþykki starfsáætlun að öllu leyti nema því sem varðar inntöku 12 mánaða gamalla barna haustið 2021. Tel að fara hefði átt milliveg hvað inntökualdur varðar og fresta inntöku 12 mánaða gamalla barna um eitt ár, í ljósi fjárhagsstöðu bæjarins. Með því hefði mátt halda inni atriðum eins og ráðningu grunnskólafulltrúa á fræðslusvið og Söngvaflóði, svo eitthvað sé nefnt. Inntaka ungra barna er mjög dýr og eitt og annað hægt að gera í staðinn.

Rósa Njálsdóttir M-lista bókaði eftirfarandi:

Þar sem Miðflokkurinn er fylgjandi því að skólamáltíðir í grunnskólum eigi að vera gjaldfrjálsar get ég ekki verið samþykk 7% hækkun á fæðisgjöldum.

Þess í stað vil ég fara þá leið að hagræða enn frekar í hráefniskaupum og reyna að lækka kostnað mötuneytanna m.a. með því að minnka matarsóun.


Meirihluti fræðsluráðs bókar eftirfarandi:

Meirihluti fræðsluráðs vill vekja athygli á að markmiðið hefur verið að fæðissala standi undir öllum kostnaði við rekstur mötuneyta, þ.e. hráefni, launum, rafmagni (1%), viðhaldi (2%) og afborgun stofnkostnaðar (4%). Til þess að ná markmiðinu þyrfti að hækka gjaldskrána um 16%-17% í stað 2,5%. Ákveðið er að fæðisgjald í grunnskólunum fyrir árið 2021 standi aðeins undir hráefni og launakostnaði, en ekki undir öðrum kostnaði og tekur því undir 7% hækkun fæðisgjalds.