Námskeið í félagsfærni fyrir unglinga haldið á velferðarsviði

Velferðarsvið Akureyrarbæjar hefur síðustu vikur staðið fyrir svokölluðu PEERS-námskeiði í félagsfærni fyrir unglinga á aldrinum 13 til 15 ára en námskeiðinu lauk í síðustu viku. PEERS stendur fyrir Program for the Education and Enrichment of Relational Skills sem gæti útlagst á íslensku sem Uppfræðsla og efling félagsfærni.

Um er að ræða gagnreynt námskeið fyrir unglinga og ungmenni með einhverfu og ADHD. Þetta er í fyrsta sinn sem velferðarsvið stendur fyrir PEERS-námskeiði í fullri lengd fyrir unglinga en áður hefur verið haldið námskeið fyrir fullorðna. Námskeiðið var 14 tímar og áætlað er að halda annað slíkt í haust.

Fimm ungmenni úr áttunda og níunda bekk, ásamt foreldrum sínum, luku námskeiðinu að þessu sinni. Kennslan fór fram í tveimur hópum þar sem unglingarnir voru saman og foreldrarnir á öðrum stað, en farið var yfir sama eða svipað efni í báðum hópum. Í lok hvers tíma komu hóparnir saman; lögð voru heimaverkefni fyrir unglingana og foreldrarnir fengu það hlutverk að vera félagsþjálfi barnsins og áttu að æfa og styðja unglinginn sinn í að framfylgja heimaverkefnunum.

Markmið PEERS-námskeiðs í félagsfærni er meðal annars að fólk læri leiðir til að eignast vini og halda þeim, getið valið sér hópa sem henta hverjum og einum og læri að takast á við stríðni og einelti, einnig að foreldrar læri leiðir til að efla félagslegt sjálfstæði unglingsins.

Leiðbeinendur á námskeiðinu voru Fanney Jónsdóttir, Gyða Björk Aradóttir, Anna Dögg Sigurjónsdóttir, Anna Marit Níelsdóttir, Ingveldur Sigurðardóttir og Þórhildur G. Kristjánsdóttir.

Ungmennin fimm sem sóttu námskeiðið.