Heimilt að halda áfram skipulagsvinnu fyrir Tónatröð

Á fundi skipulagsráðs í gær var fjallað um fyrirhugaðar breytingar á skipulagi vegna uppbyggingar við Tónatröð.

Lögð var fram umsögn Veðurstofu Íslands varðandi minnisblað GeoTek ehf. um jarðvegsaðstæður og byggingarhæfi lóða. Þá var jafnframt lagt fram minnisblað verkfræðistofunnar Mannvits um umferðargreiningu í tengslum við áhrif af byggingu 70 íbúða við Tónatröð.

Meirihluti skipulagsráðs samþykkti á fundinum að heimila umsækjanda að vinna tillögu að deiliskipulagsbreytingu sem byggir á áður innsendum gögnum. Í þeirri vinnu þurfi þó að gera ráð fyrir að umfang uppbyggingar minnki niður í fjögur hús en samkvæmt upphaflegum tillögum var gert ráð fyrir fimm húsum. Jafnframt þurfi að skoða sérstaklega afmörkun svæðisins og skuli breyting á deiliskipulagi einvörðungu ná til svæðis vestan megin við Tónatröð.

Skipulagsráð fól skipulagsfulltrúa einnig að halda áfram vinnu við breytingu á gildandi aðalskipulagi til samræmis við ofangreint og jafnframt óska eftir heimild Minjastofnunar til að fjarlægja hús á lóð Tónatraðar 8 í samráði við eigendur.

Markmiðið með þeirri tillögu sem liggur fyrir er að nýta svæðið betur en gert er ráð fyrir í gildandi skipulagi með því að byggja fjölbýlishús við Tónatröð. Skipulagslýsing vegna breytinganna var í kynningu frá 15. desember til og með 12. janúar. Samtals bárust 113 ábendingar af ýmsum toga, meðal annars varðandi umfang og fjölda bygginga á svæðinu, sem hafa verið og verða áfram hafðar til hliðsjónar við skipulagsvinnuna.

Smelltu hér til að skoða vefsvæði með öllum helstu upplýsingum um málið.