Hrísey og Grímsey eru töfrandi eyjur hvor á sinn hátt. Hér er mynd af nýja tákninu fyrir heimskautsbauginn í Grímsey, Orbis et Globus. Verkið er eftir Kristinn E. Hrafnsson og Studio Granda og var vígt 2017. Það hefur mikið aðdráttarafl fyrir ferðafólk.
Bæjarstjórn Akureyrarbæjar ákvað á fundi sínum 19. mars sl. að veita 75% afslátt af gatnagerðargjöldum á lóðum í Hrísey og Grímsey til ársloka 2021, í samræmi við heimild í 2. mgr. í 5.2. gr. í gjaldskrá gatnagerðargjalda. Þetta er gert í því skyni að styðja við uppbyggingu í eyjunum með vísan til brothættra byggða.
Halla Björk Reynisdóttir, forseti bæjarstjórnar, segir að meginmarkmiðið með því að veita þennan afslátt sé að hvetja einstaklinga sem hafa hug á því að ráðast í byggingarframkvæmdir í annarri hvorri eyjunni til þess að fara af stað sem fyrst og ýta þannig undir uppbyggingu á öðrum sviðum mannlífsins. "Bærinn hefur um nokkurt skeið komið að ýmsum verkefnum sem ætluð eru til þess að efla byggðina í eyjunum og þetta er einn liður í því," segir Halla Björk.
Grímsey og Hrísey eru sem kunnugt er hluti sveitarfélagsins. Grímsey sameinaðist Akureyrarbæ árið 2009 og Hrísey árið 2004.