Bæjarstjórn

Bæjarstjórn samþykkir með 11 samhljóða atkvæðum að vísa ársreikningi bæjarins fyrir árið 2023 til bæjarráðs og síðari umræðu í bæjarstjórn.

Hilda Jana Gísladóttir S-lista óskar bókað:

Það er áhyggjuefni að A-hluti Akureyrarbæjar sé rekinn með 454 m.kr. tapi. Þá veldur það vonbrigðum að rekstrargjöld aukist hlutfallslega á milli ára umfram rekstrartekjur, þrátt fyrir stórauknar tekjur. Það er lykilatriði í rekstri bæjarins að verja grunnstoðir í rekstri bæjarins, en sérstaklega nauðsynlegt er að verja félagsþjónustuna og tryggja rekstur skólakerfisins með sæmandi hætti. Þá eiga bæjarbúar rétt á að vera upplýstir um raunverulega rekstrarniðurstöðu í stað þess að ársreikningur Akureyrarbæjar sé notaður í markaðs- og ímyndarherferð sem sendi villandi skilaboð til samfélagsins.


Sunna Hlín Jóhannesdóttir og Gunnar Már Gunnarsson B-lista óska bókað:

Það er full ástæða til að fylgjast vel með þróun fjármála sveitarfélagsins og sýna varkárni í útgjöldum, enda hlutverk okkar að viðhalda stöðugleika og vinna okkur nær sjálfbærri fjármálastjórnun. Útgjöld í A-hluta hafa hækkað meira milli ára en tekjur og niðurstaðan fyrir fjármagnsliði er rúmum 400 milljónum lakari en áætlanir gerðu ráð fyrir. Miðað við þær framkvæmdir sem fyrirhugað er að ráðast í, og ef ekkert verður gert til að draga úr útgjöldum, þá er viðbúið að halli á rekstri A-hluta muni aukast á næstu árum. Því er raunveruleg hætta á að við fjarlægjumst fremur en nálgumst markmið okkar um að ná sjálfbærni í rekstri. Að endingu hefði þurft að kynna betur breytingar á reikningsskilaaðferðum Norðurorku, bæði gagnvart bæjarfulltrúum og eins í almennri upplýsingagjöf til íbúa þegar ársreikningur sveitarfélagsins var gerður opinber.

Bæjarstjórn samþykkir tillöguna með 11 samhljóða atkvæðum.

Bæjarstjórn samþykkir með 11 samhljóða atkvæðum að vísa samningnum til síðari umræðu í bæjarstjórn í samræmi við 18. gr. sveitarstjórnarlaga.

Bæjarstjórn samþykkir með 11 samhljóða atkvæðum framlagða breytingu á deiliskipulagi fyrir Glerá. Jafnframt samþykkir bæjarstjórn tillögu skipulagsfulltrúa að svörum við athugasemdum.

Bæjarstjórn samþykkir með 11 samhljóða atkvæðum í samræmi við stefnu Akureyrarbæjar um íbúasamráð að fella úr gildi samþykkt fyrir hverfisnefndir á Akureyri.

Þrátt fyrir fjölgun íbúa og gríðarlega fjölgun ferðamanna hefur verið bent á að jafn margir lögreglumenn sinni útkalli á Akureyri og nágrenni og var árið 1980, við því sé nauðsynlegt að bregðast og fjölga lögreglumönnum. Ekki aðeins hefur málum á borði embættisins fjölgað heldur eru brotin m.v. upplýsingar frá embættinu alvarlegri og á það m.a. við um ofbeldisbrot, kynferðisbrot og heimilisofbeldi, auk þess sem ofbeldi gegn lögreglumönnum hefur aukist. Bæjarstjórn skorar því á ríkisvaldið að tryggja tafarlausar úrbætur í mönnun lögreglunnar á Norðurlandi eystra.