Bæjarstjórn

Meirihluti bæjarstjórnar samþykkir framlagða breytingu á deiliskipulagi sem nær til lóðarinnar Austursíðu 2 með þeim breytingum að gert verði ráð fyrir göngu- og hjólastíg meðfram nýrri aðkomu frá Austursíðu að verslunum, nýrri gönguþverun yfir Austursíðu á móts við Rimasíðu og að háspennulína Landsnets verði merkt inn á skipulagið. Jafnframt samþykkir meirihluti bæjarstjórnar tillögu að svörum við athugasemdum.

Sóley Björk Stefánsdóttir V-lista situr hjá við afgreiðsluna.

Bæjarstjórn samþykkir með 11 samhljóða atkvæðum að breyting á deiliskipulagi Fosshlíðar-Mánahlíðar-Sunnuhlíðar-Barmahlíðar verði auglýst skv. 1. mgr. 41. gr. skipulagslaga nr. 123/2010. Breytingin nær yfir götu og gangstéttir Skarðshlíðar frá gatnamótum við Fosshlíð að Sunnuhlíð og einnig hluta Sunnuhlíðar, frá bílastæði við verslunarmiðstöðina og vestur fyrir lóðina Sunnuhlíð 10. Í breytingunni er verið að breyta útfærslu og legu gatna og stíga með það að markmiði að auka öryggi óvarinna vegfarenda og lækka umferðarhraða.

Bæjarstjórn samþykkir með 11 samhljóða atkvæðum að gjaldskrá gatnagerðargjalda breytist þannig að gjald hækki og verði fyrir parhús-raðhús 15%, fyrir fjölbýlishús 12,5% og gerður verði nýr liður fyrir sameiginlega bílakjallara fjöleignahúsa og gjald verði 5%.

Bæjarstjórn samþykkir með 11 samhljóða atkvæðum eftirfarandi umsögn um Hvítbók um byggðamál:

Bæjarstjórn Akureyrarbæjar lýsir yfir almennri ánægju með inntak hvítbókar um byggðamál, þau markmið sem þar eru sett fram sem og það víðtæka samráð sem viðhaft er við mótun hennar. Bæjarstjórn fagnar sérstaklega aðgerð C4 sem miðar m.a. að því að mótuð verði stefna sem skilgreini hlutverk Akureyrar sem stærsta þéttbýliskjarnans á landsbyggðinni og stuðli að uppbyggingu borgarsvæðis á grunni Akureyrar sem geti boðið upp á fjölbreytileika í þjónustu, menningu og atvinnutækifærum, sem í dag er einungis að finna á höfuðborgarsvæðinu. Slíkt sé gert með það að markmiði að jafna búsetuþróun innanlands og styrkja þannig samkeppnishæfni landsins alls. Þá fagnar bæjarstjórn verkefni B9 um miðstöð norðurslóðamála þar sem markmiðið er að styrkja stöðu Akureyrar sem miðstöðvar norðurslóða á landsvísu og efla samstarf þeirra fjölmörgu aðila sem hafa aðkomu að málaflokknum. Bæjarstjórn telur hins vegar að markmiðum fylgi of sjaldan fjármagnaðar aðgerðir.

Bæjarstjórn Akureyrarbæjar sendir eftirfarandi ábendingar varðandi tilteknar aðgerðir og/eða nýjar aðgerðir.

- A3: Staðsetja ætti björgunarþyrlu á Akureyri.

- A9: Mjög mikilvægt verkefni um stuðning við verslun í strjálbýli.

- A10: Ferjur til og frá Hrísey og Grímsey verði skilgreindar sem þjóðferjuleiðir og verði hluti af hinu almenna vegakerfi og þ.a.l. gjaldfrjálsar.

- A14: Mikilvægt er að meta kostnaðarauka fyrir sveitarfélög ef við á t.d. ráðstöfun fjármuna til grunnskóla í tengslum við nám án aðgreiningar.

- B3: Landshlutasamtökum sveitarfélaga verði falið skýrt, fjármagnað hlutverk.

- B7: Árangursmælikvarði verði breytt og frekar horft til fjölda starfa sem ráðið er í utan höfuðborgarsvæðisins.

- Farið verði í jöfnun eldsneytisverðs á flugvöllum þannig að aðrir millilandaflugvellir en í Keflavík, þ.e.a.s. á Akureyri og Egilsstöðum, verði raunhæfir kostir fyrir millilandaflug. Ekki verði dregið úr stuðningi við Flugþróunarsjóð.

- Markvissar, fjármagnaðar aðgerðir um dreifingu ferðamanna um landið vantar.