Eldur í Glerárskóla – skólahaldi aflýst í dag

Slökkviliðið að störfum á vettvangi. Mynd: Óðinn Svan Óðinsson RÚV

Eldur kviknaði í Glerárskóla á tólfta tímanum í gærkvöldi. Slökkvistarf gekk vel og tókst fljótt að ráða niðurlögum eldsins. Rafmagnslaust er í skólanum og verður ekkert skólastarf þar í dag. 

Eldurinn kom upp í kjallara skólans og barst reykur og sót í nærliggjandi spennistöð sem olli rafmagnsleysi í hverfinu.

Unnið er að því að meta skemmdir. Við fyrstu sýn virðist sem tjónið sé nokkuð staðbundið, eldvarnarhólf byggingarinnar sönnuðu gildi sitt og sluppu nýuppgerðar álmur skólans vel.