Fjárhagsáætlun 2012 - fræðslu- og uppeldismál

Fyrir fundinn voru lagðar til kynningar forsendur fjárhagsáætlunar 2012, sem samþykktar hafa verið í bæjarráði.

Fyrir fundinn voru lögð fyrstu drög að fjárhagsáætlun málaflokksins fyrir árið 2012 til kynningar og umræðu.

Á fundinum var farið yfir helstu þætti fjárhagsáætlunar málaflokksins fyrir árið 2012.

Til umfjöllunar voru tillögur að fjárhagsáætlun málaflokksins fyrir árið 2012.

Fyrir fundinn var lögð tillaga að fjárhagsáætlun fræðslu- og uppeldismála fyrir fjárhagsárið 2012. Í fjárhagsáætluninni er gert ráð fyrir því að rekstarkostnaðurinn verði kr. 4.528.166.000 sem er í samræmi við nýja tillögu að ramma. Gert er ráð fyrir því í áætluninni að eftirtaldir liðir verði bættir í ramma: kr. 10.400.000 vegna kostnaðar við stuðning barna í leikskólum, kr. 8.500.000 vegna hækkunar á niðurgreiðslum vegna m.a. systkinafsláttar og einstæðra, kr. 24.000.000 vegna hækkunar kostnaðar vegna dagforeldra, kr. 7.500.000 vegna fjölgunar um 1,2 stöðugildi aðstoðarleikskólastjóra skv. kjarasamningi, kr. 15.000.000 leiðrétting vegna einkareknu leikskólanna Hólmasólar og Hlíðarbóls, kr. 5.000.000 leiðrétting vegna húsaleigu leikskólanna Sunnubóls, Krógabóls og Tröllaborga, kr. 4.140.000 vegna aukins kostnaðar vegna tölvuþjónustu samanber miðlægan samning, kr. 900.000 vegna húsaleigu kennaraíbúðar í Grímsey og kr. 3.400.000 leiðréttingu vegna vanáætlaðs kostnaðar við rekstur Tónlistarskólans í Hofi.
Gjaldskrá leikskóla er leiðrétt þannig að dvalartími í leikskóla verði kr. 2.840 á mánuði sem þýðir að 8 klst. á dag kosta á mánuði kr. 22.723 og fullt fæði verði kr. 6.840 á mánuði. Með þessari breytingu verður hlutur foreldra af heildartekjum sem hlutfall af brúttó kostnaði leikskólanna 22,5% í stað 21,2% áður. Breyting á gjaldskrá fæðis tekur mið af því að í leikskólum á fæðissala að standa undir hráefnisverði. Skv. þessu er gjaldskrá vegna fæðis í leikskólunum leiðrétt um u.þ.b. 5%. Gjaldskrá grunnskóla er leiðrétt þannig að máltíð nemenda verði 350 kr. og máltíð starfsmanna 250 kr. Breyting fæðis í grunnskólunum tekur mið af því að fæðissala standi undir launum, auk hráefniskostnaðar. Gjaldskrá skólavistunar er leiðrétt um 12%. Þá er gjaldskrá Tónlistarskólans leiðrétt um 12% þar sem annar rekstrarkostnaður hækkar mikið en skólagjöld eru hugsuð til að mæta öðrum kostnaði en launum kennara og stjórnenda.
Áfram verður leitað leiða til að hagræða í málaflokknum á árinu 2012.

Til kynningar var farið yfir breytingar sem voru gerðar á fjárhagsáætlun fræðslu- og uppeldismála vegna lækkunar á tryggingagjaldi.

Logi Már Einarsson S-lista óskaði eftir því að tekin væri umræða í nefndinni um áhrif gjaldskrárhækkana í leikskólum og grunnskólum sem samþykktar hafa verið í fjárhagsáætlun 2012. Þá óskaði hann eftir umræðu um þær breytingar sem fyrirhugaðar eru á matarmálum skólanna. Logi lýsti yfir miklum áhyggjum af því hvaða afleiðingar þessar hækkanir og breytingar geti haft fyrir börn og fjölskyldur í bænum.
Á fundinum voru einnig lögð fram gögn sem sýna samanburð á gjaldskrám Akureyrarbæjar við gjaldskrár nokkurra stórra sveitarfélaga.