Úti alla nóttina í Hlíðarfjalli

Mynd: Katrín Björg Ríkarðsdóttir.

Formlega er skíðavertíðinni í Hlíðarfjalli lokið en lyfturnar verða ræstar aftur með viðhöfn á föstudaginn kl. 15 og látnar ganga viðstöðulaust í 32 tíma eða til kl. 23 á laugardagskvöldið. Boðið verður upp á alls kyns húllumhæ í Fjallinu þegar gestir kveðja frábæran skíðavetur og fagna vorinu.

Á miðnætti föstudaginn 6. maí verður boðið upp á hamborgara frá Norðlenska ásamt léttum veitingum frá Ölgerðinni. Sólarupprás á laugardagsmorgun verður kl. 4.15 og gestir geta keypt morgunmat frá Hótel KEA í veitingasölunni frá kl. 4-8. Klukkan 23 á laugardagskvöld verður aftur slökkt á skíðalyftunum eftir 32ja tíma stanslausa skíðahátíð og skíðaveturinn kvaddur með flugeldum í Hlíðarfjalli.

Flugfélag Íslands tekur þátt í fjörinu og skorar á skíðafólk fyrir sunnan að skella sér norður til að renna sér í vorrökkrinu og fagna á skíðum dagrenningu á laugardagsmorgun. Allir farþegar Flugfélags Íslands til Akureyrar geta framvísað brottfararspjaldi í Fjallinu dagsettu föstudaginn 6. eða laugardaginn 7. maí og fengið 50% afslátt af lyftumiðum.

Þeir sem kjósa frekar að hjóla en renna sér á skíðum geta tekið hjólhestana með sér í Fjarkann og látið vaða niður „Suðurbrautina“ svokölluðu. Þar hefur Hjólreiðafélag Akureyrar útbúið sérstaka þrautahjólabraut. Hægt verður að kaupa stakar ferðir upp með Fjarkanum eða nota vetrarpassann.

Allt stefnir í að gestir í Hlíðarfjalli verði um 70.000 þennan veturinn.