Spá aukinni dreifingu gosmóðunnar

Spá fyrir klukkan 17 á morgun. Mynd: Veðurstofa Íslands.

Því er spáð að móðu frá eldgosinu í Holuhrauni verði vart á stóru svæði næsta sólarhring. Á Akureyri hefur fólk fundið fyrir óþægindum vegna gosmengunar.

Gosmóðan úr Holuhrauni lagðist yfir norðan- og norðvestanvert landið í gær, en til þessa hafa íbúar á landinu norðaustanverðu helst orðið hennar varir. Enn gætir gosmóðu á þessu svæði og Veðurstofunni hafa í morgun borist tilkynningar frá fólki á Vestfjörðum sem verður móðunnar vart.

Styrkur brennisteinsdíoxíðs er almennt ekki mikill í byggð, en fólk með viðkvæm lungu finnur fyrir því. Þannig hafa heilbrigðiseftirliti Norðurlands-eystra borist tilkynningar frá fólki á Akureyri sem finnur fyrir einkennum.

Í dag spáir Veðurstofan mengun á norðanverðu hálendinu vestur að Langjökli, norður til Skagafjarðar og inn á Húnaflóa. Í kvöld og fyrramálið er síðan spáð mjög aukinni dreifingu. Þá er talin hætta á mengun frá Ströndum austur til Eyjafjarðar og á norðanverðu hálendinu. Á Austurlandi er spáð mengun frá Egilsstöðum og suður um til Hornafjarðar. Veðurstofan segir ekki hægt að útiloka mengun á stærra svæði.

Á fjórða tug jarðskjálfta hafa mælst í og við Bárðarbungu frá miðnætti. Sá stærsti 4,5 að stærð. Þá hafa mælst hátt í 40 jarðskjálftar við enda kvikugangsins norðan Vatnajökuls.

Hér má sjá gagnvirkt kort Veðurstofunnar um líklega útbreiðslu gosmóðunnar næstu tvo daga. 

Frétt af ruv.is.