Við Ráðhústorg.
Kraftmiklir, ungir og fallegir tónar fylla miðbæ Akureyrar föstudagsmorguninn 16. mars milli klukkan 10 og 11 en þá hefja upp raust sína í
göngugötunni, neðst í stöllum Skátagilsins, hátt í 1.500 leik- og grunnskólanemar. Yfirskrift þessa skemmtilega
uppátækis er Söngdagar og verður þetta endurtekið á sama tíma föstudaginn 23. mars.
Söngdagarnir eru skipulagðir af starfsfólki leik- og grunnskóla Akureyrar og eru haldnir í tilefni 150 ára afmælis bæjarins en sjálfur
afmælisdagurinn er 29. ágúst. Staðið hafa yfir miklar æfingar í skólunum síðustu mánuði þar sem tónstiginn
hefur komið að góðum notum við upphitun. Krakkarnir munu syngja lög á borð við Akureyri og norðrið fagra, Snert hörpu
mína og Krummi svaf í klettagjá.
Þeir sem eiga leið um miðbæinn á þessum tíma eru hvattir til að staldra við og hlýða á sönginn.