Í vikunni fór fram tveggja daga ráðstefna í Háskólanum á Akureyri þar sem athyglinni var beint að sjávartengdri
ferðaþjónustu og mannlífi og umhverfi á norðurslóðum. Ráðstefnan var skipulögð af Stofnun Vilhjálms Stefánssonar
í samvinnu við RHA, NORA, Rannsóknamiðstöð ferðamála, Norsk Sjømatsenter og Íslenska vitafélagið.
Sjávartengd ferðaþjónusta nýtur sífellt meiri vinsælda og tekur á sig margbreytilegar myndir. Sumir ferðamenn vilja kynnast mannlífi
sjávarplássa, upplifa náttúruna, þögnina, skoða fugla og sel og renna fyrir fisk á friðsælum firði. Aðrir vilja spennu
hraðbátsins, fara á brimbretti, sjóskíði og kafa, eða leigja sér bát og láta reyna á eigin kunnáttu. Svo eru þeir sem
ferðast í hópum frá höfn til hafnar og frá landi til lands á risavöxnum skemmtiferðaskipum.
Á ráðstefnunni var fjallað um ýmsar hliðar sjávartengdrar ferðaþjónustu og áskoranir tengdar henni, unnið var í
hópum og farið í vettvangsferð.