Úr Krossanesborgum.
Á mánudag var listaverkið Sigling fært niður að Pollinum við Drottningarbraut. Þar stendur það við nýjan göngustíg sem
strax er orðinn vinsæll meðal bæjarbúa og gesta bæjarins. Ýmislegt fleira hefur verið gert í sumar til að auka útivistarmöguleika og
afþreyingu bæjarbúa og ferðafólks.
Í fólkvangnum í Krossanesborgum var gerður 0,6 km stígur og er heildarlengd útivistarstíganna þar orðin 4,4 km að lengd. Einnig var
komið fyrir 10 upplýsingaskiltum víðsvegar um svæðið þar sem ýmsan fróðleik er að finna svo sem um fuglalíf, plöntur,
jarðfræði, hernám, áveituskurð og eyðibýlið Lónsgerði.
Á Hamarkotstúni var settur upp 9 körfu frisbígolfvöllur og eru bæjarbúar hvattir til að nýta sér þennan nýja
afþreyingarmöguleika. Skorkort eru aðgengileg í kassa við upphafsreit.
Og austan Glerár við gömlu steypustöðina hefur verið gerð fjallahjólabraut þar sem bæjarbúar geta nú reynt sig í
miserfiðum torfærum.