Taktu þátt í mótun leiðanetsins

Samráð við almenning 

Við mótun nýs leiðanets var leitað eftir þáttöku íbúa og annarra hagsmunaaðila. Upplýsingasvæði var opnað á vefnum í lok október, um leið og fyrstu tillögur voru kynntar, og var þá óskað eftir ábendingum frá íbúum, til dæmis um legu leiða og staðsetningu stoppistöðva. Meðal annars var hægt að skoða leiðanetið á gagnvirku korti og gera athugasemdir við einstaka hluta þess. Haldinn var rafrænn íbúafundur og kynningarefni sett upp á Glerártorgi. Þá var helstu hagsmunahópum boðið til samtals um tillögurnar og þeim gefinn kostur á að koma umsögnum á framfæri.

Tillögurnar sem kynntar voru upphaflega byggðust á markmiðum og leiðarljósum sem stýrihópur verkefnisins mótaði ásamt sérfræðingum. Leiðarljósin tóku meðal annars mið af gagnaöflun síðasta vetur, það er könnun meðal íbúa og samráði við börn og ungmenni í sveitarfélaginu. 

Það hefur verið frábært að finna fyrir miklum áhuga íbúa á verkefninu og er öllum þátttakendum í samráðinu þakkað kærlega fyrir þeirra mikilvæga framlag. Alls bárust hátt í 200 ábendingar við fyrstu tillögur, auk athugasemda sem komu fram á rafrænum íbúafundi og í umsögnum og samtölum við hagsmunaaðila. Allar ábendingar komu til skoðunar og reynt var að mæta sem flestum, eftir því sem hægt er innan ramma verkefnisins.

Í lokaskýrslu er ítarleg umfjöllun um niðurstöður samráðs. 

  

ATH: Lokað hefur verið fyrir ábendingar. Unnið er að endurskoðun tillagna út frá þeim fjölmörgu ábendingum sem bárust í samráðsferlinu. 

Við erum að leita eftir hugmyndum og ábendingum varðandi legu leiða og staðsetningu stoppistöðva fyrir nýtt leiðanet. Allar ábendingar eru mikilvægar og verða til skoðunar. Óskað er eftir því að ábendingar berist eigi síðar en 18. nóvember. 

Ábendingar á gagnvirkum kortavef

Hér má skoða tillögur að leiðanetinu á gagnvirku korti og gera athugasemdir. 

Hægt er að senda inn hugmynd/ábendingu með því að velja hnappinn: "Add Comment" í efra hægra horninu. Til þess að athugasemd nýtist sem best er æskilegt að tilgreina leið og bæjarhluta og útskýra vel hvað er átt við. Einnig er hægt að stækka svæðið sem um ræðir áður en athugasemd er gerð og þá fylgir stækkaða myndin athugasemdinni og auðveldar úrvinnsluna. 

Þú getur fært kortið með því að halda niðri vinstri músartakkanum. Til að stækka eða minnka kortið er hægt að færa músarhjólið fram og til baka eða velja +/- í neðra hægra horninu.

Hægt er að sjá nánari upplýsingar um hverja leið með því að smella á leiðina á kortinu eða smella á leiðina í listanum vinstra megin á skjánum. Þegar leið hefur verið valin er hægt að finna fyrstu drög að tíðni yfir daginn fyrir leiðina. Athugið að tíðni liggur ekki endanlega fyrir og gæti tekið breytingum. Stefnt er að 15-20 mín. tíðni á annatíma. 

Hugmyndir að stoppistöðvum leiða birtast sem hvítir punktar þegar kortið hefur verið stækkað nægilega mikið. Auðvelt er að skoða mismunandi akstursstefnu leiðarinnar með því að smella á Inbound eða Outbound.

Neðst undir listanum til vinstri er hægt að sjá fjarlægð frá stoppistöðvum með því að velja augað. Við skipulagningu almenningssamgangna er gjarnan miðað við 400 m radius, en áætlað er að meðalmanneskja sé um fimm mínútur að ganga slíka vegalengd.

Almennar ábendingar 

Við tökum líka á móti almennum ábendingum og athugasemdum í gegnum netfangið nyttleidanet@akureyri.is 

Óskað er eftir því að athugasemdir berist eigi síðar en 18. nóvember. 

 

Síðast uppfært 30. mars 2021