Stjórn Akureyrarstofu

122. fundur 02. maí 2012 kl. 18:00 - 19:29 Fundarherbergi Akureyrarstofu í menningarhúsinu Hofi
Nefndarmenn
  • Halla Björk Reynisdóttir formaður
  • Hildur Tryggvadóttir
  • Jón Hjaltason
  • Hildur Friðriksdóttir
  • Jóhann Jónsson
  • Matthías Rögnvaldsson áheyrnarfulltrúi
  • Unnsteinn Jónsson áheyrnarfulltrúi
Starfsmenn
  • Þórgnýr Dýrfjörð fundarritari
Dagskrá

1.Verkefnisstjórn um mótun atvinnustefnu

Málsnúmer 2011110167Vakta málsnúmer

Lögð fram formlega áfangaskýrsla verkefnisstjórnarinnar þar sem gerð er grein fyrir þeirri greiningar- og tengslavinnu sem fram hefur farið sl. ár og lagðar fram eftirfarandi tillögur:

1. Nauðsynlegt er að fara út í víðtækari stefnumótun þar sem kallaðir verða til helstu hagsmunaaðilar í atvinnulífinu með svipuðum hætti og gert var í vinnunni 1999 og fjallað er nánar um í þessari skýrslu. Skilgreindir verði sameiginlegir hagsmunir og kortlagðar leiðir til að ná þeim fram. Verkefnum verði forgangsraðað eftir því hvað hagsmunaaðilar eru tilbúnir að leggja af mörkum til þeirra. Tryggt verði að verkefni séu eign tiltekinna hagsmunaaðila sem vinna þeim framgang.
2. Áfram verði til sérstakur hópur sem hafi atvinnumál sem megin viðfangsefni, hlutverk hópsins er að vera verkefnastjóra atvinnumála innan handar og leiða saman hagsmunaaðila í atvinnulífinu.
3. Verkefnastjórn atvinnumála sér helstu hlutverk AFE vera þau að sinna stærri fjárfestingarverkefnum í Eyjafirði, koma á samstarfi milli svæða auk þess að efla samstarf sitt við Akureyrarstofu og Markaðsskrifstofu ferðamála á Norðurlandi þegar það á við. Akureyrarstofa og AFE fari þegar í aðgerðir til að auka aðstoð við nýsköpun og frumkvöðlastarf.

Stjórn Akureyrarstofu þakkar verkefnisstjórninni góða vinnu og skýrsluna þar sem teknar eru saman niðurstöður þeirrar greiningarvinnu sem stjórnin hefur staðið fyrir og er mikilvægt veganesti fyrir framhaldið. Jafnframt samþykkir stjórnin að áfram verði til verkefnisstjórn sem haldi utan um ítarlegri stefnumótun og að undirbúningur hennar hefjist nú þegar.

Stjórn Akureyrarstofu óskar eftir því að fráfarandi verkefnisstjórn skipi tvo fulltrúa úr sínum hópi og að leitað verði til Háskólans á Akureyri um að skipa einn fulltrúa í nýja verkefnisstjórn sem mun annast undirbúning næsta fasa í vinnunni.

2.AK-Extreme 2012 - styrkumsókn

Málsnúmer 2012040141Vakta málsnúmer

Erindi ódags. frá Sigurði Árna Jósefssyni f.h. Brettafélags Íslands þar sem óskað er eftir styrk að upphæð kr. 300.000 vegna snjóflutninga að stökkpallinum sem notaður var á snjóbrettamótinu sem haldið var dagana 12.- 15. apríl sl.

Stjórn Akureyrarstofu samþykkir að styrkja viðburðinn um kr. 200.000 og felur jafnframt framkvæmdastjóra Akureyrarstofu að ræða við skipuleggjendur hátíðarinnar um samstarf um þróun hennar og eflingu til framtíðar.

3.Hátíðahöld um verslunarmannahelgina - samningur við Vini Akureyrar

Málsnúmer 2011120061Vakta málsnúmer

Lögð fram drög að samningi við Vini Akureyrar um framkvæmd fjölskylduhátíðar um verslunarmannahelgar næstu 3 árin.

Stjórn Akureyrarstofu samþykkir samninginn með þeim athugasemdum sem fram komu á fundinum.

4.Kvennakór Akureyrar - umsókn um nýjan samning

Málsnúmer 2012010388Vakta málsnúmer

Tekin fyrir að nýju beiðni frá Kvennakór Akureyrar um endurnýjaðan samning og hækkun á framlögum til starfseminnar.

Stjórn Akureyrarstofu samþykkir að endurnýja samninginn við Kvennakórinn og að á samningstímanum verði framlag til kórsins hækkað til jafns við framlög til Karlakórs Akureyrar-Geysis.

Fundi slitið - kl. 19:29.