Skólanefnd

Á fundinn mættu undir þessum lið Dan Brynjarsson fjármálastjóri Akureyrarbæjar og Eggert Þór Óskarsson forstöðumaður fjárreiðudeildar og gerðu grein fyrir fyrirkomulagi innheimtumála og fóru yfir stöðuna á innheimtum sem heyra undir skóladeild. Fram kom að málum hjá Intrum vegna skulda í skólum hefur fjölgað um 50 á milli ára og heildarskuldir úr rúmum 14 milljónum í rúmar 19 milljónir.

Á fundinum var gerð grein fyrir stöðu mála í daggæslu á Akureyri. Daggæsluráðgjafi, Guðrún S. Kristinsdóttir og leikskólaráðgjafi, Sesselja Sigurðardóttir, mættu á fundinn og gerðu grein fyrir þjónustunni, eftirlitinu, meðferð ágreiningsmála og kostnaði.

Fyrir fundinn er lögð ósk frá stjórn Dagvistunar og Félags dagforeldra á Akureyri og nágrenni, um endurskoðun á samningi milli einstakra dagforeldra og Akureyrarbæjar. Lagt er til að ákvæðum um launatryggingu verði breytt og þau gerð sveigjanlegri en nú er.

Fyrir fundinn var lagt fram til kynningar uppgjör á rekstri Tónlistarskólans á Akureyri fyrir fyrstu 7 mánuði ársins. Þar kemur fram að rekstur er í járnum og er ein af skýringunum sú að tekjur eru ofáætlaðar sem nemur 3 milljónum.

Skólastjóri Tónlistarskólans, Hjörleifur Örn Jónsson, gerði grein fyrir starfsemi skólans og áætluðum breytingum á starfsemi hans eftir flutning í nýtt húsnæði í Hofi. Þar kom m.a. fram að á síðasta skólaári var skólinn rekinn innan heimilda og var rekstrarafgangur tæpar 4 milljónir. Þetta náðist með miklu aðhaldi og breytingum á rekstri skólans. Síðastliðið haust var ráðist í skipulagsbreytingar á starfsemi skólans og var sett sú meginregla að allir nemendur tækju annaðhvort árs- eða áfangapróf, að allir nemendur sæktu tónfræðigreinar og tækju þátt í samspili, en árið 2008 voru um 200 nemendur í námi við almennu deildina þar sem þessa var ekki krafist. Haldnir voru foreldrafundir að hausti þar sem skólastjórnendur útskýrðu hið nýja fyrirkomulag og fóru meðal annars yfir kostnaðarskiptingu á milli sveitarfélags og þjónustuþega. Í kjölfar kröfu um aukið gegnsæi námsárangurs var tekinn upp sá siður að útbúa einstaklingskennsluáætlanir fyrir alla nemendur skólans og endurskoða þær reglulega. Kennarar héldu fundi með foreldrum og nemendum að hausti, fóru yfir áætlanir og hittu síðan samkennara á sömu hljóðfæri með reglulegu millibili yfir veturinn til að ræða framvindu einstakra nemenda. Fjöldi áfangaprófa frá Tónlistarskólanum á Akureyri voru 27 árið 2009. Í lok skólaársins 2009-2010 hafði 61 nemandi tekið samræmd áfangapróf í skólanum. Þó að ársbundnar sveiflur geti vissulega haft áhrif í þessum efnum telur stjórn skólans þó að þessi tvöföldun á fjölda áfangaprófa á milli ára sé að miklu leyti afrakstur skýrrar stefnu sem gerir sanngjarna kröfu um árangur bæði til nemenda og kennara. Haustið 2010 var á Akureyri í fyrsta sinn gerð sú krafa í tónlistarskóla á Íslandi að tónlistarkennarar ynnu stóran hluta af undirbúningi fyrir kennslu og önnur fagleg störf í skólanum. Á síðustu tveimur árunum hefur skólinn lagt mikla áherslu á samstarf við aðrar stofnanir og sýnileika í bæjarlífinu og mun það verða gert áfram þó ýmsar breytingar verði með tilkomu aðstöðunnar í Hofi. Akureyringar gera miklar kröfur til Tónlistarskólans síns. Hlutverk hans er ekki einungis að þjónusta grunnskóla, veita almenna tónlistarfræðslu og sérhæfða einkakennslu fyrir nemendur á efri stigum heldur er einnig gerð skýlaus krafa um að Tónlistarskólinn standi fyrir uppákomum af margvíslegu tagi og sjái bæjarbúum fyrir tónlistarflutningi við ýmis tækifæri. Stefna skólans er að vinna ötullega samkvæmt aðalnámskrá menntamálaráðuneytisins og tryggja að starfið í skólanum verði unnið á eins faglegum forsendum og auðið er með allri þeirri þjónustu sem það krefst. Stjórn skólans bindur vonir við að hið nýja fyrirkomulag muni hleypa nýju lífi í starf skólans í Hofi og virkja þann faglega kraft og sérþekkingu sem í kennurum skólans býr, menningarsamfélaginu til góðs.

Erindi, ódags., frá stjórn Tónlistaskólans á Akureyri þar sem skólanefnd er bent á erfiða stöðu skólans vegna hljóðfæraleigu til nemenda við skólann. Ástand hljóðfæra skólans er almennt orðið mjög slæmt og vegna erfiðrar fjárhagstöðu er ekki hægt að lagfæra eða endurnýja hljóðfærin. Stjórnin telur óráð að leggja leiguna niður, því ekki hefur reynst vilji til þess á almennum markaði að setja upp slíka leigu. Því er lagt til að hljóðfæraleigunni verði markaður ákveðinn tekjustofn sem standi undir rekstri hennar.

Á fundinum var ætlunin að fara yfir drög að starfsáætlun skólanefndar fyrir árið 2011.