Skipulagsráð

Unnið hefur verið að undirbúningi að lýsingu deiliskipulags fyrir svæði sem afmarkast af Hjalteyrargötu í vestri, Laufásgötu í austri, Gránufélagsgötu í norðri og Strandgötu í suðri og á fundi skipulagsráðs þann 26. júní sl. voru kynntar nokkrar útfærslur að mögulegri uppbyggingu á svæðinu. Nú er lögð fram tillaga þróunaraðila að uppbyggingu sem nær eingöngu yfir svæði sem nær að Kaldbaksgötu en ekki austur að Laufásgötu. Er í tillögunni gert ráð fyrir að á þessu svæði verði byggð allt að fimm 6-11 hæða fjölbýlishús með atvinnustarfsemi ásamt bílastæðahúsi á neðstu hæð.

Unnið hefur verið að gerð deiliskipulags fyrir svæði sem nær til Tryggvabrautar milli Hjalteyrargötu og Glerárgötu og athafnasvæðis norðan hennar að Glerá. Er deiliskipulagið unnið í samvinnu Akureyrarbæjar og Vegagerðarinnar. Á fundi skipulagsráðs 10. apríl 2019 voru kynntir nokkrir kostir varðandi útfærslu Tryggvabrautar og þriggja gatnamóta sem á henni eru. Er gerð grein fyrir þessum kostum í meðfylgjandi skýrslu Eflu verkfræðistofu sem dagsett er 5. apríl 2019. Kemur þar m.a. fram að það sé mat ráðgjafa að hringtorgalausnir á gatnamótum hafi fleiri kosti en ljósastýrð gatnamót og að ákjósanlegast sé að gera ráð fyrir tvístefnu hjólastíg sunnan Tryggvabrautar frekar en einstefnu hjólastígum beggja vegna götunnar.

Lögð fram tillaga Kollgátu ehf., f.h. umhverfis- og mannvirkjasviðs Akureyrarbæjar, að deiliskipulagi fyrir lóð Glerárskóla. Er í deiliskipulaginu m.a. afmarkaður byggingarreitur fyrir nýjan leikskóla með tengingu við suðurhlið núverandi íþróttahúss. Þá er gert ráð fyrir breytingum á núverandi bílastæðum auk nýrra bílastæða á suðvesturhluta svæðisins, með aðgengi frá Drangshlíð.

Á fundinn komu Ingólfur Freyr Guðmundsson frá Kollgátu og Tómas Björn Hauksson frá umhverfis- og mannvirkjasviði og gerðu grein fyrir tillögunni.

Lagður fram töluvpóstur frá Skipulagsstofnun, dagsettur 25. júní 2019, þar sem fram kemur að stofnunin telji að fyrirhuguð efnistaka við Glerárós kalli á breytingu á aðalskipulagi.

Lagðar fram að lokinni grenndarkynningu tillöguteikningar Kollgátu að nýju 216 m² íbúðarhúsi með bílskúr á lóðinni Þingvallastræti 31. Tillagan var grenndarkynnt með bréfi dagsettu 12. apríl 2019 með fresti til 13. maí 2019 til að gera athugasemdir. Ein athugasemd barst á kynningartíma þar sem fram koma þær áhyggjur að framkvæmdir á lóð 31 geti haft neikvæð áhrif á nærliggjandi lóðir, t.d. jarðvegssig.

Lögð fram að lokinni grenndarkynningu, tillaga að breytingu á deiliskipulagi sem nær til lóðarinnar Eyrarlandsveg 31 sem felur í sér að heimilt verður að rífa núverandi hús og byggja nýtt allt að 250 m² hús í staðinn. Þar sem í gildi er hverfisvernd sem nær til lóða 27-35 er í skilmálum kveðið á um að nýtt hús verði að taka mið af útliti núverandi húss og falli inn í götumyndina. Þá er gert ráð fyrir að heimilt verði að gera bílastæði á lóðinni með aðkomu frá Barðstúni. Tillagan var grenndarkynnt með bréfi dagsettu 24. maí 2019 með fresti til að gera athugasemdir til 25. júní 2019, auk þess sem óskað var umsagnar Minjastofnunar og Minjasafns Akureyrar.

Tvær athugasemdir bárust á kynningartíma auk umsagnar frá Minjastofnun Íslands.

Erindi móttekið 21. júní 2019 þar sem Halldór Áskelsson fyrir hönd Halldórs Áskelssonar ehf., kt. 610208-1690, sækir um tímabundið stöðuleyfi fyrir aðstöðuhúsi, 20 feta gámi, á lóðinni nr. 1 við Oddeyrarbót. Meðfylgjandi er mynd.

Ólafur Kjartansson V-lista hefur óskað eftir umræðu um framkvæmdir vegna flóðavarna á bílaklúbbssvæðinu og áætlun um að grafa skurð þvert á hlíðina. Er lagt fram minnisblað Eflu um ofanvatnsmál Bílaklúbbs Akureyrar dagsett 16. febrúar 2018 og minnisblað umhverfis- og mannvirkjasviðs um forgangsröðun aðgerða.

Ólafur Kjartansson V-lista óskaði eftir umræðu um hver staðan væri á gildandi skipulagi og leyfum KKA til að nota ofanvert Torfnagil og móana milli gilsins og Hlíðarfjallsvegar sem endurosvæði.

Lögð fram að lokinni grenndarkynningu, fyrirspurn G. Odds Víðissonar arkitekts dagsett 24. maí 2019, f.h. Festi hf., kt. 540206-2010, um hvort heimilt verði að koma fyrir allt að 10 hótelíbúðum á 2. og 3. hæð Tryggvabrautar 18 fyrir skammtímaleigu. Áfram yrði gert ráð fyrir verslun á jarðhæð. Var fyrirspurnin grenndarkynnt með bréfi dagsettu 5. júní 2019 með fresti til 4. júlí 2019 til að gera athugasemdir.

Byggingarfulltrúi óskar umsagnar skipulagsráðs um erindi móttekið 24. júní 2019 þar sem Valþór Brynjarsson fyrir hönd Hölds ehf., kt. 651174-0239, sækir um byggingarleyfi fyrir innanhússbreytingum á Tryggvabraut 14 auk þess sem gert er ráð fyrir dæluskúr austan við húsið. Meðfylgjandi eru teikningar eftir Valþór Brynjarsson. Fyrir liggur að lóðarhafi og leigutaki Tryggvabrautar 16 gerir ekki athugasemd við byggingu dæluskúrsins.

Erindi dagsett 1. júlí 2019 þar sem Haraldur Árnason fyrir hönd Trétaks ehf., kt. 551087-1239, sækir um heimild til breytingar á deiliskipulagi fyrir lóðina nr. 1 við Geirþrúðarhaga. Sótt er um hækkun á nýtingarhlutfalli úr 0,770 í 0,850, þannig að byggingarmagn verði 1.540 fermetrar. Einnig er óskað eftir að svalir íbúða megi fara 1,9 m út fyrir byggingarreit í stað 1,6 m, að byggingarreitur stigahúss stækki um 0,6 m og að bílastæðum verði fjölgað um 6 og verði alls 23. Verður sett snjóbræðslulögn í gangstétt meðfram bílastæðum. Gert er ráð fyrir allt að 19 íbúðum í húsinu. Þá er bent á að æskilegt væri að færa byggingarreit bílakjallara á lóð Kjarnagötu 57 fjær lóðarmörkum þannig að hann verði í t.d. 4 m fjarlægð í stað 0,5 m. Meðfylgjandi er uppdráttur eftir Harald Árnason.

Erindi dagsett 1. júlí 2019 þar sem eigendur Klettaborgar 5, Ragnheiður Runólfsdóttir og Klettaborgar 7, Svala Jónsdóttir og Birkir Hreinsson sækja um breytingar á lóðamörkum í samræmi við meðfylgjandi samkomulag.

Einnig sækja Svala og Birkir um að ljósastaur sem staðsettur er á milli húsanna verði tekinn niður eða færður, þannig að stækkun lóðar geti nýst sem bílaplan.

Lögð fram til kynningar samantekt um hlutfall yfirvinnu af dagvinnu í júní 2019 samanborið við júní 2018 og árin 2013-2017.

Samkvæmt Jafnréttistefnu Akureyrarbæjar skal hvert ráð velja sér þróunarleiðtoga jafnréttismála sem hefur m.a. það hlutverk að vera formlegur málsvari kynjasamþættingar í starfi viðkomandi ráðs. Helgi Snæbjarnarson hefur verið þróunarleiðtogi en þar sem hann er ekki lengur í skipulagsráði þarf að skipa nýjan.

Lögð fram til kynningar fundargerð 728. fundar, dagsett 20. júní 2019, með fullnaðarafgreiðslum erinda. Fundargerðin er í 10 liðum og er að finna á heimasíðu Akureyrarbæjar.

Lögð fram til kynningar fundargerð 729. fundar, dagsett 28. júní 2019, með fullnaðarafgreiðslum erinda. Fundargerðin er í 10 liðum og er að finna á heimasíðu Akureyrarbæjar.