Önnur mál í framkvæmdaráði 2016

Málsnúmer 2016010009

Vakta málsnúmer

Framkvæmdaráð - 325. fundur - 19.02.2016

Njáll Trausti Friðbertsson D-lista óskar bókað:

Ég tel nauðsynlegt að tekin séu saman gögn um lengd gatnakerfisins og stígakerfisins í sveitarfélaginu. Einnig verði skoðað hvernig sú þróun hefur verið á undanförnum árum.

Ég tel þessi gögn mikilvæg inn í þá vinnu sem framundan er varðandi nýtt aðalskipulag. Nýtist vel í umræðu varðandi snjómokstur og nýja umhverfis- og samgöngustefnu sem nú er unnið að.

Framkvæmdaráð - 326. fundur - 18.03.2016

Njáll Trausti Friðbertsson D-lista óskar eftir því að fjármálastjóri sveitarfélagsins komi fyrir framkvæmdaráð og ræði stöðu eignarsjóðs gatna og þróun hans undanfarin áratug.

Einnig óskar Njáll eftir að afskrifta- og endurmatsreglur sjóðsins verði kynntar fyrir ráðinu.

Framkvæmdaráð - 327. fundur - 22.04.2016

Ingibjörg Ólöf Isaksen óskar eftir sundurliðuðum heildarkostnaði á Drottningarbrautarstíg.

Umræður urðu um tíðar bilanir á svifryksmælunum og hvernig þau mál standa. Mælarnir eru báðir bilaðir og er Umhverfisstofnun sem eigandi að skoða hvort gera eigi við þá.

Umræður um bókun hverfisráðs Grímseyjar um ástand gámasvæðis. Bæjartæknifræðingur upplýsti fundinn um að farið verði í framkvæmdir sem fyrirhugaðar voru á síðasta ári og komust ekki til framkvæmda.

Einnig var upplýst um íbúafund um nýtt leiðakerfi strætó sem halda á 2. maí nk. í Hofi.

Sæbjörg Sylvía vekur athygli á snjómokstri og upphitun kirkjutrappanna sem er í ólestri. Einnig telur hún ótækt að almenningssalernin undir kirkjutröppunum séu lokuð og að finna þurfi lausn á salernismálum ferðamanna.

Framkvæmdaráð - 329. fundur - 20.05.2016

Ingibjörg Ólöf spyr um rusladalla í Giljahverfi og óskar eftir að fá sent kort af þéttleika þeirra. Óskar eftir að bætt verði við rusladöllum ef í ljós kemur að of fáir dallar eru á svæðinu.

Framkvæmdaráð - 332. fundur - 22.07.2016

Rætt um nýtt leiðakerfi SVA og seinkun á útboði nýrra metanvagna sem opna átti í júlí, en vegna breytinga á útboðsgögnum frestast það fram í lok september nk.

Framkvæmdaráð - 336. fundur - 06.10.2016

a. Kynnt niðurstaða á tilboði á tækjum í eigu Umhverfismiðstöðvar.

b. Kynnt tillaga að merkingu á strætisvagna „Frítt í strætó“.

Jónas Vigfússon forstöðumaður Umhverfismiðstöðvar sat fundinn undir þessum lið.
a. Meirihluti framkvæmdaráðs hafnar tilboðum og leggur til að tækin verði auglýst aftur í bæjarmiðli og Bændablaðinu.

b. Framkvæmdaráð samþykkir tillöguna.

Framkvæmdaráð - 340. fundur - 05.12.2016

Rætt um ráðningu í starf sviðsstjóra umhverfis- og mannvirkjasviðs.

Njáll Trausti Friðbertsson D-lista óskar bókað vegna ráðningar í starf sviðsstjóra umhverfis- og mannvirkjasviðs.

Í samþykkt um stjórn og fundarsköp Akureyrarkaupstaðar sem samþykkt var í bæjarstjórn í seinna sinn 17. mars 2015, segir í 50. gr. um ráðningar í æðstu stjórnunarstöður: "Bæjarstjóri, í umboði bæjarstjórnar og að fenginni umsögn viðkomandi fagnefnda, ræður embættismenn sem heyra beint undir hann í skipuriti svo og framkvæmdastjóra fyrirtækja með sjálfstæðan fjárhag sem eru í eigu bæjarsjóðs og veitir þeim lausn frá starfi." Í ljósi þessa ákvæðis geri ég alvarlega athugasemd við þá ákvörðun bæjarstjóra að leita ekki eftir umsögn stjórnar framkvæmdaráðs við ráðningu í stöðu sviðsstjóra umhverfis- og mannvirkjasviðs.



Formaður framkvæmdaráðs óskar bókað eftirfarandi svar við athugasemdum Njáls eftir að hafa haft samráð við bæjarstjóra;

Samkvæmt 50 gr. samþykktar um stjórn og fundarsköp Akureyrarkaupstaðar segir að bæjarstjóri, í umboði bæjarstjórnar og að fenginni umsögn viðkomandi fagnefnda, ráði embættismenn sem heyra beint undir hann í skipuriti. Samkvæmt nánari skilgreiningu á hverjir teljist embættismenn segir í 9. gr. samþykktar fyrir framkvæmdaráð að bæjarstjóri ráði deildarstjóra framkvæmdadeildar og framkvæmdastjóra Fasteigna Akureyrarbæjar að fenginni umsögn framkvæmdaráðs. http://www.akureyri.is/is/moya/page/samthykkt-um-framkvaemdarad-3



Bæjarráð sem stjórnsýslunefnd bæjarins samþykkti samhljóða á fundi sínum 29. september 2016 að leggja niður störf deildarstjóra framkvæmdadeildar og framkvæmdastjóra Fasteigna Akureyrarbæjar. Bæjarstjórn staðfesti bókunina samhljóða 4. október sl.

Bæjarráð samþykkti á fundi sínum 13. október sl. eftirfarandi bókun um nýjar stöður sviðsstjóra hjá Akureyrarbæ; Bæjarráð samþykkir framlagðar starfslýsingar. Jafnframt felur bæjarráð bæjarstjóra og aðgerðahópi umboð til að auglýsa stöður sviðsstjóra lausar til umsóknar og ganga frá ráðningum í samráði við bæjarráð.
Framkvæmdaráði og stjórn Fasteigna Akureyrarbæjar ber því ekki að veita umsagnir vegna ráðningar sviðsstjóra umhverfis- og mannvirkjasviðs samkvæmt núverandi samþykktum og ofangreindri bókun bæjarráðs.