Frístundaráð

Frístundaráð þakkar fyrir kynninguna.

Frístundaráð samþykkir að tryggja slátt á svæði Bílaklúbbsins fyrir utanhússæfingar bogfimideildar Akurs.

Frístundaráð tekur jákvætt í erindið en frestar afgreiðslu þess þar sem ekki er hægt að segja til um á þessari stundu hvernig staðan á COVID-19 verður á komandi vikum og mánuðum og hvort hægt verði að uppfylla þau skilyrði sem sett eru fram á hverjum tíma.

Frístundaráð fagnar framkomnum tillögum að breytingum á stígakerfi Akureyrarbæjar. Ráðið vill sérstaklega taka undir þau markmið sem þar koma fram um að auka hlutfall samgönguferða hjólandi og gangandi með bættri aðstöðu. Fjölgun slíkra ferða fellur vel að markmiðum Akureyrarbæjar um að vera heilsueflandi samfélag og dregur úr svifryksmengun. Þá tekur ráðið undir það að mikilvægt sé áfram að bjóða upp á aðlaðandi umhverfi til útivistar allan ársins hring enda er aðstaðan vel nýtt af bæjarbúum.

Um leið gerir frístundaráð athugasemd við að útivistarslóðir séu ekki sýndar á uppdrætti á breytingum, heldur einungis á mynd á bls. 31 í greinargerð. Þetta gæti orðið villandi fyrir bæjarbúa sem telja þá e.t.v. að umferð gangandi sé bönnuð um gömlu brýrnar og stíg í gegnum golfvallarsvæðið. Þá má líka velta fyrir sér hvort leiðin yfir gömlu brýrnar ætti ekki að flokkast sem stígur frekar en slóð.


Helgi Rúnar Bragason áheyrnarfulltrúi ÍBA lagði fram eftirfarandi bókun:

ÍBA fagnar þeirri metnaðarfullu vinnu sem lögð hefur verið fram um nýtt stígakerfi á Akureyri. Skipulagið er vel til þess fallið að efla enn frekar almenningsíþróttir á Akureyri þar sem komið er til móts við gangandi, hlaupandi og hjólandi vegfarendur.

Frístundaráð getur ekki orðið við erindinu.

Frístundaráð gerir engar athugasemdir við nýja menntastefnu.

Nokkrar tilnefningar bárust frístundaráði og þakkar ráðið þeim aðilum sem sendu inn tilnefningarnar.

Frístundaráð samþykkir að veita leikskólanum Lundarseli viðurkennigu í flokki fyrirtækja/stofnana en skólinn hefur unnið markvisst með kynjajafnrétti í sínu starfi sl. 10 ár.



Í flokki einstaklinga samþykkir ráðið að veita Stefaníu Sigurdísi Jóhönnudóttur sérstök hvatningarverðlaun en Stefanía hefur verið ötull talsmaður jafnréttis í Menntaskólanum á Akureyri og m.a. fengið styrk frá Norðurorku til að halda fyrirlestra og vinna að fræðsluefni undir yfirskriftinni "Af hverju er ég femínisti?". Einnig hefur hún fengið boð frá Jafnréttisstofu, ásamt tveimur öðrum stúlkum úr MA, um að halda erindi á alþjóðlegri ráðstefnu um skaðsemi neikvæðra staðalímynda í skólastarfi. Stefanía, ásamt Ásthildi Ómarsdóttur, halda úti hlaðvarpinu VAKNAÐU þar sem fjallað er um jafnréttismál í víðum skilningi. Stefanía hefur stýrt málstofu um samskipti kennara og nemenda um mikilvægi þess að afnema neikvæðar staðalímyndir í orðræðu og námsefni skólans. Þá var hún fengin til að halda erindi á kennarafundi um jafnréttismál í skólanum.


Viðurkenningarnar verða afhentar við fyrsta tækifæri.

Frístundaráð tekur vel í þær hugmyndir sem koma fram í minnisblaðinu og vill hvetja bæjarráð til að setja aukið fjármagn í atvinnuátaksverkefni með áherslu á skapandi verkefni og koma til móts við hæfni hvers og eins með það að markmiði að geta boðið sem flestum vinnu.