Bæjarstjórn

Ársreikningur Akureyrarbæjar fyrir árið 2019 var borinn upp í heild sinni og samþykktur með 11 samhljóða atkvæðum.



Bæjarfulltrúar D-lista leggja fram eftirfarandi bókun:

Nú ber svo við að rekstur A-hluta bæjarsjóðs er jákvæður um rúmar 57 milljónir og hefur það ekki gerst síðan 2013. Ástæða þessa er í raun sú að 2013 var fráveitan seld til Norðurorku og nú var jörðin Reykir í Fnjóskadal seld til Norðurorku fyrir 83 milljónir sem dugði til að A-hluti bæjarsjóðs sýndi jákvæða niðurstöðu.

Rekstur A-hluta bæjarsjóðs hefur verið rekinn með halla mörg undanfarin ár og er skýringin sú að hluta til að lífeyrisskuldbindingar hafa verið mun hærri en áætlanir hafa gert ráð fyrir. En það út af fyrir sig réttlætir ekki þennan hallarekstur. Á síðustu tveimur árum hefur stöðugildum í A-hluta bæjarsjóðs fjölgað um 63. Þetta þýðir að launakostnaður hefur hækkað vegna þessa um 590 milljónir á ári. Við bæjarfulltrúar Sjálfstæðisflokksins höfum bent á nauðsyn þess að sýna mikið aðhald í fjölgun stöðugilda undanfarin ár, sem ekki hefur verið hlustað á.

Í opinberri umræðu um ársreikning Akureyrarbæjar er gjarnan horft til samstæðunnar þar sem Hafnarsjóður og Norðurorka eru tekin með. Hafnarsjóður og Norðurorka hafa skilað verulegum afgangi í rekstri undanfarin ár sem er frábært og hefur gert það að verkum að samstæðan öll skilar góðum afgangi eða 463 milljónum króna árið 2019. Þessi niðurstaða gefur tilefni til að ætla að rekstur Akureyrarbæjar sé í góðum málum og jafnvel að frekar sé hægt að bæta í en hagræða eins og þörf er á. Það er mat okkar að það eigi frekar að beina sjónum að niðurstöðu í rekstri A-hluta bæjarsjóðs vegna þess að afgangur í rekstri fyrirtækja í samstæðunni verður ekki nýttur í almennan rekstur A-hluta bæjarsjóðs og því er verið að gefa villandi skilaboð þegar horft er fyrst og fremst til samstæðunnar.


Bæjarfulltrúar meirihlutans leggja fram eftirfarandi bókun:

Það er ánægjulegt að rekstur A-hluta var jákvæður um rúmar 57 milljónir króna og niðurstaðan mun betri en áætlanir gerðu ráð fyrir. Þó er mikilvægt að halda áfram að sýna aðhald í rekstri og stuðla að ábyrgri fjármálastjórn. Á sama tíma gerum við okkur öll grein fyrir því að þær aðstæður sem nú eru í samfélaginu vegna COVID-19 munu hafa veruleg áhrif á rekstur Akureyrarbæjar. Ársreikningurinn er ávallt kynntur með sama hætti.

Bæjarstjórn samþykkir með 11 samhljóða atkvæðum tillögu um breytingu á aðalskipulagi sem felur í sér breytingu á stefnu varðandi heimildir fyrir rekstrarleyfisskylda gististarfsemi á íbúðarsvæðum. Bæjarstjórn samþykkir jafnframt tillögu að svari við athugasemd.

Bæjarstjórn samþykkir með 11 samhljóða atkvæðum tillögur skipulagsráðs um úrbætur til að bæta umferðaröryggi á Hörgárbraut milli Glerár og Undirhlíðar.

Bæjarstjórn samþykkir með 11 samhljóða atkvæðum framlagða tillögu að gjaldskrá Héraðsskjalasafnsins á Akureyri.

Bæjarstjórn samykkir með 11 samhljóða atkvæðum að tilnefna Láru Halldóru Eiríksdóttur sem fulltrúa Akureyrarbæjar í stjórn Minningarsjóðs Maríu Kristínar Stephensen.

Bæjarstjórn samþykkir með 11 samhljóða atkvæðum að verja allt að 40 milljónum króna til markaðssetningar innanlands, verkefnasjóðs til að efla framboð afþreyingar og aukaúthlutunar menningarsjóðs. Bæjarstjórn felur fjársýslusviði að útbúa viðauka vegna málsins og felur Akureyrarstofu að vinna málið áfram.