Fundurinn verður í Hofi - mynd: Auðunn Níelsson
Akureyrarbær býður íbúum á opinn kynningarfund um breytingu á aðalskipulagi fyrir hluta Oddeyrar. Fundurinn verður haldinn mánudaginn 21. október klukkan 17 í menningarhúsinu Hofi.
Bæjarstjórn samþykkti nýverið skipulagslýsingu vegna breytingar á aðalskipulagi á svæði sem afmarkast af Hjalteyrargötu í vestri, Kaldbaksgötu í austri, Gránufélagsgötu í norðri og Strandgötu í suðri. Svæðið er að mestu skilgreint sem athafnasvæði en með breytingunni er gert ráð fyrir að það breytist í íbúðarsvæði þar sem heimilt verður að byggja allt að 6-11 hæða fjölbýlishús með athafnastarfsemi á neðstu hæð. Hér er nánari frétt um málið og hér er hægt að lesa lýsingu á verkefninu.
Fyrirkomulag fundarins verður þannig að Pétur Ingi Haraldsson, sviðsstjóri skipulagssviðs, kynnir í upphafi lýsingu á aðalskipulagsbreytingunni. Í kjölfarið mun Orri Árnason, arkitekt hjá Zeppelin arkitektum, kynna tillögur þróunaraðila að uppbyggingu á skipulagsreitnum. Gert er ráð fyrir að kynningarnar taki samtals um 30-40 mínútur og stax á eftir býðst fundargestum að spyrja úr sal í um 20 mínútur.
Að þeim tíma loknum gefst tækifæri til að kynna sér skipulagslýsinguna í rólegheitum, tillögur þróunaraðila og önnur gögn um málið á veggspjöldum sem verða á staðnum. Pétur Ingi og Orri verða áfram til taks og svara spurningum og ræða við gesti til klukkan 19.
Allir velkomnir!