Mikill áhugi á lóðum í Holtahverfi

Alls bárust umsóknir frá 33 einstaklingum og 15 lögaðilum um nýjar byggingarlóðir í Holtahverfi austan Krossanesbrautar.

22 lausar lóðir á þessu spennandi uppbyggingarsvæði voru auglýstar 15. september síðastliðinn með umsóknarfresti til 6. október. Gert er ráð fyrir að lágmarki 140 íbúðum í fjölbýlis-, rað-, par- og einbýlishúsum en þetta er fyrri áfangi í lóðaúthlutunum. Samkvæmt deiliskipulagi er í heildina gert ráð fyrir um 300 íbúðum á svæðinu.

Í mörgum tilvikum sóttu sömu aðilar um fleiri en eina lóð. Einbýlishúsalóðin Hulduholt 21 var vinsælust með 18 umsóknir. Í þeim tilvikum þar sem fleiri en ein umsókn berast um einbýlis- og parhúsalóðir er gert ráð fyrir að dregið verði úr umsóknum sem uppfylla almenn skilyrði.

Til viðbótar 22 lóðum sem voru auglýstar í þessum áfanga hefur húsnæðissamvinnufélagið Búfesti, í samvinnu við Félag eldri borgara á Akureyri, fengið vilyrði fyrir lóð undir fjögur fjölbýlishús sem ætlunin er að byggja upp á allt að fjórum árum.

Stefnt er að því að lóðum verði úthlutað á næsta fundi skipulagsráðs í lok október.

 

Des Nóv Okt Sep Ágú Júl Jún Maí Apr Mar Feb Jan