Lokahátíð Stóru upplestrarkeppninnar á Akureyri

Sigurvegarar voru Jóhann Valur Björnsson, Naustaskóla, Matthildur Ingimarsdóttir, Giljaskóla, og Arney Elva Valgeirsdóttir, Oddeyrarskóla.

Miðvikudaginn 10. mars fór lokahátíð Stóru upplestrarkeppninnar fram í Kvosinni, sal Menntaskólans á Akureyri. Það eru nemendur 7. bekkja grunnskóla bæjarins sem taka þátt í keppninni ár hvert. Áður hafa skólarnir haldið forkeppni og valið tvo fulltrúa sína, auk varamanns.

Að þessu sinni voru skáld keppninnar Bergrún Íris Sævarsdóttir og Kristján frá Djúpalæk. Lesið var í þremur umferðum og í fyrstu umferð fluttu þátttakendur svipmyndir úr bók Bergrúnar Írisar, Kennarinn sem hvarf. Í annarri umferð voru lesin ljóð eftir Kristján frá Djúpalæk og í síðustu umferð valdi hver flytjandi sér ljóð til flutnings.

Upphafsdagur Stóru upplestrarkeppninnar er á degi íslenskrar tungu, 16. nóvember, ár hvert en það er fæðingardagur Jónasar Hallgrímssonar. Fram að lokakeppni leggja nemendur og kennarar áherslu á að æfa upplestur og vanda framburð og huga vel að áherslum, túlkun og framkomu í ræðustóli.

Að venju voru nemendur sér og skólum sínum til mikils sóma þennan dag og dómarar hafa ekki verið öfundsverðir af því hlutskipti að velja einn fremur öðrum í verðlaunasæti. Eins og áður var það Ingibjörg Einarsdóttir sem var formaður dómnefndar en hún er einn af upphafsmönnum keppninnar, sem fór fyrst fram í Hafnarfirði fyrir tuttugu og fimm árum.

Ómissandi þáttur hátíðarinnar er tónlistarflutningur nemenda Tónlistarskólans á Akureyri. Tónlistarflytjendum og kennurum þeirra eru færðar bestu þakkir fyrir allan þeirra undirbúning og æfingar sem skiluðu sér í vönduðum og góðum flutningi.

Sigurvegarar Stóru upplestrarkeppninnar 2021 eru:

Jóhann Valur Björnsson, Naustaskóla
Matthildur Ingimarsdóttir, Giljaskóla
Arney Elva Valgeirsdóttir, Oddeyrarskóla

Smellið á myndirnar til að sjá stærri útgáfur og fletta á milli þeirra.