Barnakór Akureyrarkirkju söng jólalög.
Í kvöld voru ljósin á jólatrénu frá vinabænum Randers í Danmörku tendruð. Venjan hefur verið að efna til samkomu á Ráðhústorgi við þetta tilefni en vegna kórónuveirufaraldursins þótti slíkt ekki koma til greina að þessu sinni.
Fulltrúi frá danska sendiráðinu í Reykjavík, Adam Grønholm, kom ásamt konsúl Dana á Akureyri, Helga Jóhannessyni, til að afhenda tréð með formlegum hætti og veitti Ásthildur Sturludóttir, bæjarstjóri, því viðtöku.
Adam aðstoðaði síðan dönsk-íslensku systkinin Dagmar Elvíru, 4ra ára, og Erik Valdemar, 6 ára, við að styðja á hnappinn og kveikja ljósin á trénu. Barnakór Akureyrarkirkju undir stjórn Sigrúnar Mögnu Þórsteinsdóttur söng jólalög þegar tréð færðist í ljósaskrúða.
Fyrr í dag áttu Helgi Jóhannesson og Adam Grønholm stuttan fund með Ásthildi í Ráðhúsinu.
Kveikt hefur verið á ljósunum og kórinn syngur.
Ásthildur og Adam ásamt Dagmar Elvíru og Erik Valdemar við jólaköttinn á Ráðhústorgi.