Hagkvæmt að kaupa árskort

Frá opnunardeginum á Akureyrarvöku 25. ágúst. Mynd: Kári Fannar.

Nýtt og betra Listasafn á Akureyri var opnað með pompi og prakt um helgina. Hátt í 3.000 manns heimsóttu safnið fyrsta daginn, um 700 fyrsta hálftímann sem var opið og myndaðist biðröð í Listagilinu.

Ókeypis verður inn á safnið til og með sunnudeginum 2. september en eftir það er aðgangseyrir 1.500 krónur. Hins vegar bjóðast árskort á afar hagstæðu verði eða á aðeins 2.500 krónur og getur fólk þá heimsótt safnið eins oft og það lystir í heilt ár án þess að greiða sérstaklega fyrir hvert skipti.

Hlynur F. Þormóðsson kynningarstjóri Listasafnsins á Akureyri segir að sala árskorta hafi farið vel af stað.

"Listasafnið er svo gjörbreytt frá því sem áður var og ég held að þetta verði vinsæll samkomustaður fólks, bæði kaffihúsið nýja og svo allar sýningarnar sem hægt er að skoða. Það er því ekki spurning að fólk á að tryggja sér árskort til að geta farið um salina að lyst og notið fjölbreyttra listsýninga allt árið um kring," segir Hlynur F. Þormóðsson.

Heimasíða Listasafnsins á Akureyri.