Fjórði metanvagninn tekinn í notkun

Strætisvagnar Akureyrar fengu á dögunum afhentan nýjan strætisvagn sem er sá fjórði í flotanum sem gengur fyrir metangasi.

Kaup á nýjum strætisvagni voru boðin út síðasta vetur og í kjölfar þess samþykkti umhverfis- og mannvirkjaráð tilboð Kletts um kaup á vagninum fyrir rúmar 42 milljónir króna.

Nýi vagninn er kærkomin viðbót við flotann en með tilkomu hans er ljóst að yfir helmingur af eknum kílómetrum strætó og akstursþjónustu sveitarfélagsins eru á metani. Fimm af sex ferlibílum ganga fyrir metani.

Áfram er stefnt að því að endurnýja bílaflotann með umhverfisvænum hætti, ýmist með metani eða rafmagni.