Arnar Már tilnefndur til Íslensku bókmenntaverðlaunanna

Arnar Már Arngrímsson og kápa nýju bókarinnar.

Akureyringurinn Arnar Már Arngrímsson var tilnefndur til Íslensku bókmenntaverðlaunanna 2018 í flokki barna- og ungmennabóka fyrir bók sína Sölvasaga Daníelssonar en tilnefningarnar voru kynntar við hátíðlega athöfn á Kjarvalsstöðum í Reykjavík á fullveldisdaginn. Einnig hlaut Svarfdælingurinn Hjörleifur Hjartarson tilnefningu í sama flokki ásamt Rán Flygenring fyrir bókina Sagan um Skarphéðin Dungal sem setti fram nýjar kenningar um eðli alheimsins.

Arnar Már les upp úr Sölvasögu Daníelssonar á Amtsbókasafninu á morgun, þriðjudaginn 4. desember kl. 17.30. Um er að ræða sjálfstætt framhald Sölvasögu unglings sem út kom 2015 og hlaut Barna- og ungmennabókmenntaverðlaun Norðurlandaráðs 2016.

Á bókarkápu segir:

„Sölvi Daníelsson er á góðri leið með að verða starfsmaður aldarinnar í Bónus. Jafnaldrar hans eru á leið til Asíu eða í heimsreisu. Hann raðar saman orðum á milli vakta en kemur þeim ekki heim og saman. Eitthvað verður maður að gera. Maður verður að hugsa stórt. Svo hann fer til Akureyrar.

Þetta er saga af ungu skáldi í leit að rödd; útlaga í leit að bandamönnum; þjóð í leit að betri tilboðum og tungumáli sem fæst á 100-kall í Hertex."

Allir eru hjartanlega velkomnir á upplesturinn.