2.665 nýttu sér frístundastyrkinn árið 2024

Börn og ungmenni stunda ýmis konar íþróttir og tómstundir.

Árið 2024 nutu 2.665 börn og unglingar á aldrinum 6-17 ára góðs af frístundastyrk Akureyrarbæjar eða tæplega 85% þeirra sem áttu rétt á styrknum sem er 1% aukning frá árinu á undan.

Frístundastyrkur Akureyrarbæjar nam 50.000 krónum á hvern iðkanda árið 2024. Í heildina var rúmlega 127 milljónum króna varið í frístundastyrki í 3.577 skráningum sem jafngildir styrk upp á 47.661 krónur að meðaltali á hvern iðkanda.

Kynjahlutfall skráninga var hér um bil jafnt eða 51,5% drengir og 48,4% stúlkur. Nýtingin var áberandi mest hjá 9 ára börnum þar sem 96% af þeim aldurshópi notaði frístundastyrkinn í einhverri mynd. Flestar skráningar, eða tæp 42%, voru hjá Íþróttafélaginu Þór og Knattspyrnufélagi Akureyrar. Samstarfsaðilar (íþrótta-, æskulýðs og tómstundafélög auk fyrirtækja) sem tóku við frístundastyrk árið 2024 voru 45.

Markmið með frístundastyrk Akureyrarbæjar er að styrkja börn og unglinga til þátttöku í uppbyggilegu frístundastarfi og auka möguleika til þátttöku í því óháð efnahag. Einnig að ýta undir aukna hreyfingu, virkni og félagsþátttöku sem og að vinna gegn óæskilegu brottfalli í eldri aldurshópum iðkenda.

Frístundastyrkur Akureyrbæjar árið 2025 er 55.000 krónur og gildir fyrir öll börn fædd árið 2008 til og með árinu 2019.

Í viðhengi er samantekt á nýtingu frístundastyrks Akureyrarbæjar árið 2024.

Nánari upplýsingar um frístundastyrk Akureyrarbæjar.