Fréttasafn

Þótt ekki búi margir í Grímsey þá er orðið ansi jólalegt og flest öll húsin í þorpinu vel skreytt eins og meðfylgjandi myndir bera með sér. Þónokkur fjöldi ferðamanna hefur heimsótt eyjuna að undanförnu og fleiri en síðustu ár.

Talsvert tjón hefur orðið í Grímsey í óveðrinu sem nú gengur yfir. Klæðning er fokin af húsi útgerðarinnar að hluta, landgangur á flotbryggju við höfnina er fokinn út í veður og vind, og grindverk og girðingar hafa víða brotnað eða lagst niður í vindinum.

Áhugaverð kvikmynd með sérstaka áherslu á Grímsey var frumsýnd á þýsku sjónvarpsstöðinni WDR í gær. Myndin, sem heitir „Magical Iceland", varpar meðal annars ljósi á fjölskrúðugt náttúru- og dýralíf á Íslandi.

Endurbótum á nýrri rafstöð RARIK í Grímsey er lokið og var hún tekin í notkun í lok október. Búnaðurinn var orðinn gamall og farinn að þarfnast endurnýjunar. Nýju vélarnar eru mun lágværari en þær gömlu og hafa íbúar orðið varir við það.

Í gær, 11. nóvember, var haldið upp á fæðingardag velgjörðarmanns Grímseyinga, Bandaríkjamannsins Daniels Willards Fiske, en sá dagur er ávallt haldinn hátíðlegur í Grímsey. Haldið var kaffisamsæti í félagsheimilinu Múla kl. 18.00, boðið upp á heitt súkkulaði og bakkelsi, lesið ágrip um Fiske sem var fæddur 1831 og gluggað i gömul albúm úr skólanum. Mjög góðmennt en fámennt var úti í eyju í gær eða einungis 10 manns að þessu sinni.

Ferðalag yfir heimskautsbauginn, miðnætursól, fjölskrúðugt fuglalíf, óspillt náttúra, ferskt loft, kyrrð og ró. Það eru innihaldsefni í uppskrift að góðum degi í þætti N4 sem að þessu sinni var tekinn upp í Grímsey.

Vetur skall á með hressilegra móti í Grímsey í gær. Búið er að vera hvasst frá því í gær morgun með allt frá 18 upp í 27 metra á sekúndu og ölduhæðin núna um 5.5 metrar en fór mest upp í 7 metra í nótt.

UPPI OG NIÐRI OG ÞAR Í MIÐJU – eru tónleikar Önnu Jónsdóttur sem haldnir verða á Emelíuklöppum í Grímsey, laugardaginn 20.júlí, kl. 15.00. Anna er sópransöngkona og á tónleikum sínum víða um land syngur hún íslensk þjóðlög.

Dagskrá sumarsólstöðuhátíðarinnar í ár er ansi fjölbreytt. Í næstu viku verður heimskautsbaugstáknið "Hringur og kúla / Orbis et Globus" flutt á núverandi staðsetningu baugsins. Á fimmtudaginn 20.júní hefst síðan formleg dagskrá með fjölbreyttum viðburðum sem stendur fram á sunnudaginn 23.júní.

Undirbúningur stendur nú sem hæst fyrir Sólstöðuhátíðina sem haldin verður í Grímsey um þarnæstu helgi, 20.-23. júní. Þessi helgi í kringum sumarsólstöður er kjörin til að heimsækja Grímsey og njóta alls þess besta sem þessi náttúruperla hefur að bjóða.

Svartfuglinn er nú þegar sestur upp í björgunum til að tryggja sér hreiðurstæði og lundinn kominn að eyjunni. Svafar Gylfason, íbúi í Grímsey sem er við grásleppuveiðar þessa dagana, sá til fyrstu lundana um helgina og segir að þeir séu um viku fyrr á ferðinni en áður var, en hann hefur skráð komu þeirra undanfarin 19 ár.