Dósasímar, hlaupbangsar og froskastökk!
Það er margt svo spennandi og frábært í heiminum sem vert er að kanna betur. Hvers vegna fáum við stundum rafstraum þegar við komum við aðra manneskju? Hvers vegna er vont að kafa djúpt ofan í vatni? Hvers vegna er betra að vera með tvö augu en ekki eitt?
Verið velkomin á opna tilraunaverkstæðið við Brekkugötu 17 föstudaginn 7. september kl. 16-18. Þar býðst börnum og fullorðnum að framkvæma allskyns einfaldar tilraunir sem oft á tíðum veita svör við stórum spurningum.
Á tilraunaverkstæðinu verður einnig ýmislegt úr safnkostinum sem tengist vísindum með einhverjum hættir: Vísindabækur, dvd, spil og fleira!
Verið hjartanlega velkomin!
Viðburður þessi er hluti af dagskrá í tengslum við bókasafnsdaginn sem haldinn er hátíðlegur 7. september 2018. Yfirskrift bókasafnsdagsins í ár er: Lestur er bestur - fyrir vísindin! Í tilefni dagsins munu fjölmörg bókasöfn af öllum stærðum og gerðum víðsvegar um landið bjóða upp á ýmiskonar dagskrá. Íslensk bókasöfn eru af ýmsum toga og þjóna bæði almenningi og námsmönnum. Auk þess sinna þau sérhæfðum verkefnum í stofnunum og einkafyrirtækjum. Á Íslandi eru mörg almenningsbókasöfn, skólabókasöfn, framhaldsskólabókasöfn, háskólabókasöfn, sérfræðisöfn og annarskonar sérhæfð bókasöfn eða alls 300 talsins.
Myllumerki bókasafnsdagsins eru: #bokasafnsdagurinn #lesturerbestur