Félag aldraðra á Akureyri var stofnað í október 1982. Hvatamaður að stofnun félagsins var Jón Björnsson þáverandi
félagsmálastjóri Akureyrarbæjar. Á stofnfund félagsins þann 3. október 1982 mættu um 500 manns.
Meðal gesta var forseti Íslands, frú Vigdís Finnbogadóttir, biskupinn séra Pétur Sigurgeirsson og frú og forseti bæjarstjórnar
Valgerður H. Bjarnadóttir. Fyrsti formaður félagsins var kosinn Jón G. Sólnes bankastjóri.
Í stjórn Félags eldri borgara eru fimm manns auk fimm manna varastjórnar.
Aðalfundur er haldinn í mars. Í félaginu eru um 900 skráðir félagar.
Öll starfsemi fór áður fram í eigin húsnæði, Félagsheimili eldri borgara, að Lundargötu 7. Þetta húsnæði,
sem verkalýðsfélögin á Akureyri gáfu félaginu á sínum tíma hefur nú verið selt. Starfsemi félagsins fer
að mestu leyti fram í Félagsmiðstöð aldraðra við Bugðusíðu 1.
Á vegum félagsins eru haldnar skemmtanir einu sinni í mánuði yfir vetrartímann auk þess sem spilað er í félagsmiðstöðinni
í Bugðusíðu einu sinni í viku, á miðvikudögum. Félagsvist er spiluð hálfsmánaðarlega á fimmtudagskvöldum og
haldin eru Bingó.
Á sumrin stendur félagið fyrir ferðum fyrir eldri borgara. Farnar eru tvær lengri ferðir á hverju sumri auk þess sem farið er í dagsferðir.
Árviss sex daga ferð til Hveragerðis er farin í mars.
Félagið hefur einnig staðið fyrir gönguferðum í Kjarnaskógi alla fimmtudaga.
Innan félagsins starfar mjög öflugur kór sem stofnaður var af frú Sigríði Schiöth árið 1986 en hún var stjórnandi hans
í mörg ár. Kórinn heldur tónleika auk þess að koma fram við ýmis tækifæri. Kórinn hefur komið fram utan landssteinanna,
til dæmis í Færeyjum og í Danmörku.
Stjórnandi kórsins er Guðjón Pálsson og Petra Björk Pálsdóttir. Formaður kórsins er Gunnfríður Hreiðarsdóttir.
Allir 60 ára og eldri eru velkomnir í félagið.
- Heimilisfang: Bugðusíðu 1
- Sími: 462 3595
- Formaður : Jóhannes Sigvaldason
