Oddeyri er annað elsta hverfi Akureyrar. Byggð hófst þar um 1860 en eyrin var lengi í einkaeign og varð ekki hluti af Akureyrarkaupstað fyrr en árið 1866.
Oddeyri tilheyrði Stóra-Eyrarlandi en var seld frá jörðinni árið 1850 þegar Björn Jónsson verslunarmaður og síðar ritstjóri keypti hana af Geirþrúði Thorarensen. Björn seldi Þorsteini Daníelssyni á Skipalóni Oddeyri árið 1863. Í maí árið 1866 varð Oddeyri hluti af Akureyrarkaupstað en þrátt fyrir það var hún lengi enn í einkaeign. Þorsteinn seldi hana árið 1871 hinu nýstofnaða félagi Gránufélaginu. Áður hafði Þorsteinn selt kaupmanni að nafni Clausen Oddeyrartanga. Á þessum tíma stóðu tvö hús á Oddeyri, Lundur og torfbær. Gránufélagið hóf verslun á Oddeyri árið 1872 og upp frá því hófst myndun þéttbýlis.
Oddeyri myndaðist af framburði Glerár og áður settu kvíslir og lækir úr ánni svip sinn á eyrina. Eyrin var áður talin ná frá Oddeyrarbót að sunnan (þar sem Strandgata hefst) en að vestan að brekkunni neðan Brekkugötu. Öll byggðin austan Brekkugötu taldist því til Oddeyrar. Þegar Glerárgata varð aðaluumferðaræð í gegnum bæinn breyttust hverfamörkin í hugum fólks og telst Oddeyri nú austan Glerárgötu.
Nú, í upphafi 21. aldar, er Oddeyri eitt best staðsetta hverfi bæjarins að því leyti að stutt er í alla verslun og þjónustu. Þá er fjöldi fyrirtækja rekinn í hverfinu, þ.á m. fjölmennustu vinnustaðir bæjarins. Þrátt fyrir að hverfið sé gamalt má segja að það sé samt sem áður síungt, með nýjum leikskóla, nýviðbyggðum grunnskóla, væntanlegum tónlistarskóla auk þess sem unnið hefur verið að þéttingu byggðarinnar.
Þeim sem áhuga hafa á að kynna sér sögu Oddeyrar nánar er bent á:
Sögu Akureyrar eftir Jón Hjaltason.
Oddeyri - Húsakönnun eftir Guðnýju Gerði Gunnarsdóttur og Hjörleif Stefánsson.
Um upphaf byggðar á Oddeyri eftir Lárus Zoponíasson.
Einnig hefur Minjasafnið á Akureyri staðið fyrir gönguferðum um elsta hluta Oddeyrar og í sýningu þess Akureyri - bærinn við Pollinn kemur Oddeyri töluvert við sögu.
